Миллионды мегаполис әкімі Мұрат Әйтеновтің тапсырмасына сай Шымкент қаласындағы төрт аурухана жанынан арнайы оттегі бекеті орнатылады. Бұл туралы ақпаратты қала әкімінің баспасөз қызметі таратты.
Аталған оттегі бекеттері шаһардағы жұқпалы аурулар ауруханасы мен №1 қалалық ауруханада және №2 көпсалалы аурухана мен қалалық перзентхана базасында орын тебетін болады.
Енді жоғарыда аталған медициналық ұйымдардың әрқайсысында кислородтық 50 төсек-орын ашылмақ. Бұл туралы қала әкімінің бірінші орынбасары Ербол Садыр мәлім етті.
Ербол Әбілхайырұлы алдағы уақытта Шымкентте кислород өндіретін тағы бір цех іске қосылатынын айта өтті. Оның айтуынша, онда күніне мың, екі мың дана оттегі баллоны шығарылатынын жеткізді.
Қазіргі таңда Шымкент қаласында кислород өндіретін ірі 3 станцияның жұмысы жергілікті әкімдік тарапынан тұрақты бақылауға алынған.
Айта кетейік, бүгінде Шымкентте 722 кислородтық төсек-орын бар. Ал қаладағы 24 аурухана бір күнде 1200 кислородты баллонды қажет етеді.
