Шымкент қаласы Денсаулық сақтау басқармасының басшысы Бақытжан Позилов қаладағы эпидемиялогиялық жағдайдың тұрақсыз екенін айтып, тұрғындарға карантин талаптарын қатаң сақтауға шақырды, деп хабарлайды Аptamedia.kz тілшісі.
– Құрметті Шымкент қаласының тұрғындары! Кешегі күннен бастап қаламыз «сары аймаққа» кірді. Осы орайда инфекцияның таралуын болдырмау мақсатында сақтық шараларын қатаң ұстану қажеттігін ескертеміз. Арақашықтықты сақтап, бетперде тағып, адам көп шоғырланған орындарға, той-томалаққа бармай, сақтық шараларын ұстануға шақырамыз, – деді бас дәрігер.
Сонымен қатар, бас дәрігер коронавирус инфекциясына шалдыққан науқаспен байланыста болған азаматтар үйде отырып, карантин талаптарын ұстауы тиіс екендігін баса айтты.
– Қазіргі таңда Шымкентте коронавирустың ықтимал 3-ші толқынына дайындық жоспарға сай жүргізілуде. Төсек-орындар әзірленді. Дәріханаларда екі айлық дәрі-дәрмек қоры бар. Ең бастысы, дәрігер эпидемиологтардың айтқан талаптарын орындау қажет, – деді Б. Позилов.
