Шымкент қаласындағы клиникалық балалар ауруханасының мамандары жаңа туған сәбиге күрделі операция жасап, шақалақтың денесіне туа біткен ісікті хирургиялық жолмен алып тастады. Бұл туралы қалалық денсаулық сақтау басқармасы хабар таратты.
Сәбидің басындағы ісіктің көлемі үлкен болғанын айтады мамандар. Үлкен ісікті ақ халаттылар бала анасының құрсағында жатқан 29-аптада анықтаған. Сондықтан мамандар отаны бала дүниеге келген соң үш тәуліктен кейін жасап, шақалақтың өміріне келген қауіптің алдын алды. Ота үш сағатқа созылды және сәтті өтті дейді мамандар. Жаңа туған шақалаққа күрделі ота жасаған дәрігерлер — Абдықадыров Мұхтар және Тансық Орынбасарұлы.
Айта кетейік, қалалық клиникалық балалар ауруханасында 5 төсек-орынға лайықталған нейрохирургиялық бөлімше биылғы ақпан айында ашылған болатын. Жыл басынан бері мұнда неврологиялық жүйесінің туа бітті ақауымен дүниеге келген бес нәрестеге сәтті ота жасалып, барлығы сауығып, үйлеріне шығарылды.
