Шымкенттік оқушылар өз мықтылықтарын байқатты. Бұл жолы Семей қаласында өткен ұлттық мектеп лигасында қала атынан қатысқан оқушы қыздар бас жүлдені жеңіп алды.
Республикалық деңгейде өткен «Былғары доп» атты спартакиадаға қала атынан №39 Мағжан Жұмабаев атындағы мектептің 8 сынып оқитын қыздары қатысқан болатын. Бір апта көлемінде өткен сайыста олар 5 ойын өткізіп барлығында қарсыластарынан басым түскен.
Айта кетейік, аталған сайысқа еліміздің 8 өңірінен өз аймақтарында қарсылас шақ келтірмеген 8 команда қатысты. Олар айналма әдіс арқылы бір-бірімен кездесіп соңында ұпай саны бойынша жеңімпаздар анықталды.
Шаһардағы №39 Мағжан Жұмабаев атындағы мектептің денешынықтыру пән мұғалімі Анарбек Оразалиев сайысты ұйымдастырушылар мен шәкірттерге алғысын білдіріп, жүрекжарды лебізін жеткізді.
– Қыздарға рахмет, бар терін төгіп ойнап берді. Қарсыластар осал болған жоқ. Бәрі де мықты командалар. Сол мықты команданың ішінен ең мықтысы біз болып шықтық. Жеңіс құтты болсын! – деді ұстаз.
