Жыл сайынғы үрдіске сай, Елорда күні мерекесін шымкенттіктер де атап өтуде. Алайда, карантин режиміне байланысты іс-шаралар онлайн түрінде ұйымдастырылды.
Елорда күніне орай ұйымдастырылған онлайн іс-шараларды атап айтар болсақ, Бас қаланың туған күніне орай Шымкентте 9 инвестициялық жоба іске қосылды. Ашылу салтанатына қала әкімі Мұрат Әйтенов онлайн режимде қатысып, қала тұрғындары мен қонақтарын елорда күнімен құттықтады. Іске қосылған өндірістік нысандардың жалпы құны 2,5 миллиард теңгені құрап отыр. Соның нәтижесінде жалпы 288 адам жұмыспен қамтылған.
Мәдени іс-шаралар да ұйымдастырылды. Атап айтқанда, шымкенттік өнерпаздар мерекеге орай әннен шашу шашып, тұрғындарға көтеріңкі көңіл күй сыйлады. Қала әкімдігінің ұйытқы болуымен өткен мерекелік ән-шашу жергілікті телеарналар мен әлеуметтік желі арқылы көрермендерге ұсынылды.
Ал, зиялы қауым өкілдері, Отанымыздың жүрегі, Тәуелсіздігіміздің тірегі болған елорда жайында өз ойларын білдіріп, мерекенің мән-маңызына тоқталды.
