СОҒЫС АРДАГЕРЛЕРІНЕ ҚҰРМЕТ КӨРСЕТІЛДІ

125

Адамзат тарихындағы ең ауыр қантөгіс соғыс аяқталғанына 79 жыл толды. Зарықтырып жеткен Жеңіс күнінің қадірі бәріміз үшін тым қымбат. Өйткені ол соғыс қаншама ұрпақты қайғы-қасіретке душар етіп, өмірін өксітіп кетті. Сол соғысты майданның алдыңғы шебінде жүріп басынан өткергендер де, солардың тілеуін тілеп, тылдағы бар ауыртпалықты иығымен көтерген ардагерлер де, соғыста ата-анасынан айырылып, жетімдік тауқыметін тартып өскендер де бүгінде арамызда жүр.
Сондықтан да жыл сайын мамыр айының 9 жұлдызында сол сұрапыл соғыстағы Жеңіс күні айрықша атап өтіледі. Және ол жалпыға бірдей халықтық мереке болғанымен, бұл күні әсіресе, кешегі соғыста Жеңіс үшін қолдарына қару алып, майданның алдыңғы шебінде қанқұйлы жаумен шайқасқа түскен соғыс ардагерлеріне көрсетілер құрмет айрықша.
Түркістан облысы өзбек этномәдени бірлестігінің төрағасы Бахадыр Ирсметовтың ұйытқы болуымен жеңіс күнінің туын тіккен, ерлік пен батылдықтың өлшеусіз үлгісін көрсеткен Ұлы Отан соғысының ардагерлеріне құрмет көрсетілді. Атап айтсақ, Сайрам ауданы Қарабұлақ ауылында тұратын соғыс ардагері Ахмаджан Анартаев, Түркістан қаласында тұратын соғыс ардагері Немат Абдрасилов, Сауран ауданы Ескі Иқан ауылында тұратын соғыс ардагері Закир Мусаев, Кентау қаласында тұратын соғыс ардагері Бадан Төребаевтардың шаңырақтарында болып, сый-сияпат жасады. Өз кезегінде Ұлы Отан соғысының ардагерлері сұрапыл соғыс жылдарындағы естеліктерімен бөлісіп, «Бүгінгі бейбіт күннің қадіріне жетейік, еліміз аман болсын, енді соғыс болмасын, ондай қайғы-қасіретті кейінгі ұрпақ көрмесін» деген тілектерін жеткізді.