Қазақстан мен Қытай соттары өзара тәжірибе алмасып жатыр. Көрші елдің жоғарғы халық сотының төрағасы Чжан Цзюнь-нің шақыртуымен қазақстандық делегация Бейжіңге барды. Сапар барысында мамандар цифрлық сот зертханасы, жасанды интеллект мүмкіндіктерін көріп, Бейжің интернет сотының жұмысымен танысты.
Қытай сот жүйесіне цифрлық инновацияларды енгізуде әлем бойынша көш бастап тұр. Енді бұл елдің озық тәжірибелері елімізде қолданылады. Сот жүйесін жетілдіру мақсатында жасанды интеллект енгізілуі мүмкін. Бұл сот жұмысының тиімділігін арттырып, халықтың құқықтық жүйеге деген сенімін нығайтуға септігін тигізбек.
– Сот системасына және Үкіметте цифровизация мәселесіне мемлекет басшысының тапсырмасы бойынша ерекше көңіл бөлінуде. Халыққа сапалы қызмет жасап сонымен қатар судьяларымыз шешім шығарғанда қандай жаңа технологияларды қолдана алатыны жөнінде келіп үлкен ақпарат алдық. Қытайдың толық үлгісін ары қарай зерттеп, зерделеп өзімізге жақын, ұқсас нәрселерді аламыз деген ойымыз бар, – деді ҚР Жоғарғы Сотының төрағасы Асламбек Мерғалиев.
Сондай-ақ Қазақстан суды үнемдеу, ірі өзен-көлдерді цифрлық жүйемен басқару бойынша Қытаймен ауқымды жобаны жүзеге асырады.
Көрші мемлекеттің агросектордағы озық технологиясын енгізу үшін Қазақ ұлттық аграрлық зерттеу университетінде бірлескен технопарк құру жоспарланып отыр. Бұл туралы Қытай Халық Республикасы Мемлекеттік кеңесінің вице-премьері Лю Гочжунның Алматыға сапарында белгілі болды.
Қазақстан – көрші елдің «Бір белдеу – бір жол» бастамасын қолдайтын Орталық Азиядағы маңызды серіктесі. Кездесуде Ұлттық аграрлық зерттеу университетінің базасында Қытай Аграрлық университетінің филиалын ашу мәселесі де сөз болды. Сонымен бірге «Суды үнемдеу Цифрлық ғылыми зертханасын» құру жайы қаралды.
– Су ресурстарын басқаруымыз керек. Қытайда тәжірибе өте жақсы. Сондықтан екі академияның арасында – Қытайдың Ұлттық академиясы және біздің Ұлттық академия арасында үлкен мегагрантты іске асыратын боламыз. Суды басқару, ресурстарын басқару мегагранты. Осының барлығы қазір біздің жоспарымызда, – деді ҚР ҰҒА президенті Ақылбек Күрішбаев.
Еске сала кетсек, бүгінде Қазақстан электронды мемлекеттік қызметтердің дамуы бойынша әлемде 28, ал онлайн-қызметтердің сапасы бойынша 8-орында тұр. Мемлекеттік қызметтердің 90 пайыздан астамы автоматтандырылған.
