Қара судың бағасы «қара алтыннан» да қымбат болатын заман келеді дейді сарапшылар. Қазіргі заманда су қоры пайдалы қазбалар секілді құнды ресурс екені анық. Жаһандық климаттың өзгеруін ескерсек, оны үнемді және тиімді пайдалану мәселесі бұрын-соңды болмаған маңызға ие. Сондықтан бұл саланы дамыту ерекше назарда.
1 қыркүйекте ҚР Президенті Қасым-Жомарт Тоқаевтың Жарлығымен Су ресурстары және ирригация министрлігі құрылды. «Еліміз үшін судың маңызы мұнай, газ немесе металдан кем емес. Су шаруашылығы жүйесін тиімді дамыту мәселесімен дербес мекеме айналысуы қажет деп санаймын», — деді Мемлекет басшысы.
Министрлік қысқа аралықта құрылып, жұмыс істегеніне қарамастан, нақты нәтижелерге қол жеткізіп отыр. Салаға қажетті нормативтік құжаттар әзірленіп, су ресурстарының базасын ұлғайту бойынша жобалар жүзеге асырылып жатыр. Халықаралық ынтымақтастық дамып келеді.
Осы орайда, су кодексінің жобасы әзірленді. Құжатта гидротехникалық құрылыстардың қауіпсіздігі, суару және дренаж, сумен жабдықтау және су бұру мәселелері қамтылған. Кодекстің негізгі мақсаты – Қазақстанның су ресурстарының әлеуетін сақтау.
Су ресурстарын басқару жүйесін дамытудың 2024-2030 жылдарға арналған тұжырымдамасы әзірленді. Бұл суармалы ауыл шаруашылығы алқаптарының көлемін 2,2 млн гектарға дейін ұлғайтуға, су үнемдеу технологияларының үлесін 40%-ға дейін арттыруға, суару кезінде су ысырабын 15%-ға дейін төмендетуге мүмкіндік береді.
ҚР-ның су шаруашылығын дамытудың 2024-2030 жылдарға арналған кешенді жоспары әзірленді. Оны жүзеге асыру еліміздің су ресурстарының көлемін 3,7 текше км арттыруға, суару барысында су ысырабын азайтуға және оның көлемін 3 текше км арттыруға, 55 мыңнан астам халқы бар 41 елді мекенді сумен қамтамасыз етуге, сондай-ақ еліміздің көршілес елдерден су жеткізу бойынша тәуелділігін 25%-ға азайтуға мүмкіндік береді.
2024 жылдың 1 қаңтарынан бастап кейбір су шаруашылығы қызметкерлерінің жалақысы орта есеппен 25%-ға өседі, бұл үшін тиісті шаралар әзірленді.
Салаға мамандар қажет. Су ресурстары және ирригация министрлігі жоғары және жоғары оқу орнынан кейінгі білім беру мамандықтарының классификаторына түзетулер енгізу және су секторы бойынша бірқатар жаңа бағдарламалар енгізу, сондай-ақ қазақстандық студенттерді суға байланысты мамандықтар бойынша жақын және алыс шетелде орналасқан жоғары оқу орындарында оқыту үшін гранттар бөлу туралы ұсыныстармен шықты.
2024-2026 жылдары ел бойынша 20 жаңа су қоймасының құрылысын бастау және 15 су қоймасын қайта жаңғырту жоспарланып отыр. Суару жүйелерінің тозуы мәселелерін шешу үшін ұзындығы 3500 км құрайтын 339 канал күрделі жөндеуден өтті.
Ұлттық гидрогеологиялық қызмет құрылады. Ол жерасты суларына мониторинг және талдау жасайды, іздеу және барлау жұмыстарын ұйымдастырады және жүргізеді, сондай-ақ гидрогеологиялық ұңғымаларды жою және консервациялаумен айналысады. Бүгінде Қазақстанда 4 540 кен орны барланған.
Ақмола, Алматы, Атырау, Ұлытау, Қызылорда, Маңғыстау, Түркістан және Солтүстік Қазақстан облыстарында жалпы саны 868 мың тұрғыны бар 375 елді мекенді сумен қамтамасыз ету бойынша 33 жобаны жүзеге асыру жалғасып жатыр.
Алматы, Жамбыл, Қызылорда және Түркістан облыстарында 105,1 мың гектар аумақта ирригация және дренаждық жүйелерді дамыту жобасы жүзеге асырылуда.
Қаныш Сәтбаев атындағы каналдан Есіл және Нұра өзендеріне су жіберілді. Бұл Астана қаласын сумен қамтамасыз етудің тұрақтылығын арттырды.
Көрші мемлекеттермен су қауіпсіздігі бойынша келіссөздер белсенді жүргізілді. Олардың қорытындысы бойынша 2024 жылдың 1 сәуіріне дейін Сырдария өзеніне 11,1 текше км су келеді, «Достық» мемлекетаралық каналы арқылы 487 млн текше метр су алынады деп күтілуде.
Бұл Түркістан және Қызылорда облыстарында вегетациялық кезеңге қажетті су көлемін жинақтауға, сондай-ақ Арал теңізіне 1,6 текше км су жіберуге мүмкіндік береді.
Қырғызстанмен Жамбыл облысына су беру жөнінде келісім жасалды. Бішкектегі келіссөздер нәтижесінде Талас өзеніндегі «Түйте» каналы арқылы су беруді қалпына келтіру туралы шешім қабылданды.
Министрлік Қытаймен 20-дан астам өзен, оның ішінде Ертіс, Іле, Емел өзендері бойынша келіссөздер жүргізіп жатыр. Бүгінде тараптар келісімнің бірқатар баптары бойынша су бөлу мәселесіне қатысты ортақ келісімге келді.
Сонымен қатар Қырғызстан, Тәжікстан, Түркіменстан және Өзбекстанның қатысуымен Орталық Азия елдерінің су-энергетикалық ынтымақтастығы механизмі туралы келісім жобасы әзірленуде.
Озық зерттеу орталықтарының бірі Йель университетінің Экологиялық құқық және саясат орталығы дүние жүзіндегі экологиялық таза елдердің рейтингін талдап, Экологиялық тиімділік индексін жариялап отырады. Аталған индекс ғылыми-талдамалық деректерге негізделіп, әлем елдерінің тұрақты даму көрсеткіштері туралы жиынтық ақпараттың негізінде жасалады.
Экологияның 11 санаты бойынша 40 тиімділік көрсеткіштерін пайдалана отырып, зерттеу тобы дүние жүзінің 180 елін климаттың өзгеруі, қоршаған орта жағдайы және экожүйелердің өміршеңдігі көрсеткіштері бойынша бағалайды. Бұл мақалада Йель университеті жариялаған Экологиялық тиімділік индексі негізінде жасалған (Unsafe drinking water). Ішуге жарамсыз ауыз су индексін бөлек көрсетіп, әлемді алаңдатқан мәселеге арнайы тоқталмақпыз.
Әрбір мемлекеттегі судың сапасын бағалауда зерттеушілер қандай деректерді қамтығаны маңызды. Йель университетінің мамандары ең объективті көрсеткіш ретінде түрлі қалаларда алынған судың зертханалық талдауларының орташа көрсеткіші емес, халық арасында суды тұтынудың салдарынан туындаған денсаулыққа қатысты мәліметтерді талдау дұрыс деп шешкен. Ішуге жарамсыз ауыз су индексін құрудың басты критерийі халық тұтынатын ауыз судың әсеріне байланысты денсаулыққа келген зиян мен аурулардың орташа статистикасы алынған. Есепте сарапшылар «DALY» көрсеткішін қолдана отырып, тұтынған ауыз судың әсерінен 100 мың адамға шаққанда денсаулығына зиян келген, мүгедектікке шалдыққан статистикалық деректердің жас бойынша стандартталған өмір сүру мәліметтерін пайдаланған.
Екі жылда бір рет жаңартылып отыратын рейтингтің соңғы нұсқасы 2022 жылы шықты. Индексте қамтылған барлық мемлекет 0-ден 100-ге дейінгі шкала бойынша бағаланады әрі ең жоғары ұпай таза әрі сапалы ауыз суды қамтамасыз ете алған мемлекеттерді білдіреді.
Тізімнің үздіктеріне 100 ұпай алған 10 мемлекет енген. Зерттеу дерегінен көріп отырғанымыздай, индекстің алғашқы ондығында Аустрия, Финляндия, Греция, Исландия, Ирландия, Мальта сынды Еуропа мен Жерорта теңізі мемлекеттері орналасқан. Индексте Армения – 39, Беларусь 40-орынға жайғасса, Қазақстан әлемдік көрсеткіште 54-орынға тұрақтаған. Атап өтетін жайт Қазақстан 2020 жылғы рейтингте де 55,8 ұпаймен 54-орынды иеленген еді.
Ал өзге Орта Азия елдері ішінен Өзбекстан – 60, Түрікменстан – 77, Қырғызстан 78-орында орналасқан. Түркия 80-орынға тұрақтаса, Әзербайжан 84-орында тұр. Зерттеу рейтингінде төмен көрсеткіштерді Африка құрлығы мемлекеттері иеленген. Камерун – 170, Нигерия 177-орынға тұрақтаған.
Бүгінгі таңда таза ауыз су мәселесі адамзат баласы үшін өзекті болып отыр. БҰҰ-ның дерегінше, дүние жүзінде миллиардтаған адам әлі күнге дейін таза ауыз суға қол жеткізе алмай келеді. Дүниежүзілік метеорологиялық ұйымның (ДМҰ) су ресурстары бойынша климаттық қызметтердің жай-күйі туралы соңғы есебіне сәйкес, суға байланысты тәуекелдер жоғары қарқынмен өсіп келеді. 2000 жылдан бастап су тасқыны – 134, құрғақшылықтың ұзақтығы 29 пайызға өскен.
Қазірдің өзінде мамандар жаhандық климаттың жылынуына байланысты 2050 жылға қарай Орталық Азияда су тақырыбы күрделі мәселе болатындығын болжап отыр. Негізгі өзендері көршілес мемлекеттерден бастау алатын Қазақстан үшін су мәселесі шешімін табуды қажет ететін стратегиялық басымдықтардың бірі екені анық. Елімізде ауылдар мен шалғай өңірдегі халқымызды таза ауыз сумен қамтамасыз ету мақсатында мемлекеттік бағдарламалар жүйелі түрде жұмыс істеп келеді. Дегенмен жерасты суларының картасын жаңарту, бұл бағытта тиісті ғылыми зерттеулер жүргізу сынды атқарылатын мәселелер де баршылық.
Йель университетінің Экологиялық тиімділік индексі мен Ішуге жарамсыз ауыз су есептері ғалымдарға, аталған сала мамандарына, жалпы тақырыпқа қызығушы қауымға қажетті көмекші құрал бола алады.
Өткен жылы желтоқсан айында Су ресурстары және ирригация бірінші вице-министрі Болат Бекнияз еліміздегі су қорының 1%-ы ғана тұрғындарды ауыз сумен қамтуға жұмсалатынын мәлімдеген болатын.
Жыл сайын Қазақстан аумағында 102,3 текше шақырым су қоры жиналады. Оның ішінде 1,2 текше шақырымы, яғни, жалпы су көлемінің 1%-дан астамы тұрғындарды ауыз сумен қамтуға жұмсалады.
Парламент Мәжілісінің депутаты Сергей Пономаревпен диалог барысында Су ресурстары және ирригация бірінші вице-министрі Болат Бекнияз тұрғындарды сапалы ауыз сумен қамтамасыз ету жұмыстары туралы айтты.
Экономиканың қажеттіліктері үшін жылдық су тұтыну шамамен 25 текше шақырымды құрайды. Оның 65 пайызы ауыл шаруашылықтың, 25 пайызы өнеркәсіптің қажеттіліктеріне бағытталады.
«Сол себепті Қазақстан халқы ауыз судан тарығады деп айтуға болмайды. Барлық нормативтік құжаттарда, Су кодексінде ең бірінші орында азаматтарымызды ауыз сумен қамтамасыз ету мәселесі тұр. Біз алдағы 2 жылда еліміздің барлық өңірін орталықтандырылған су жүйесімен қамтамасыз етуді жоспарлап отырмыз. Қандай табиғи жағдай болмасын, климаттың өзгеруі немесе трансшекаралық су ресурстарының азаюы ауыз су тапшылығына әкелмейді. Себебі тұрғындарға қажетті ауыз су көлемі жалпы су қорының 1%-ын ғана құрайды», деді вице-министр.
Таяуда Премьер-Министрдің орынбасары Серік Жұманғарин суару мәселелері бойынша республикалық кеңес өткізді.
Ауыл шаруашылығы, су ресурстары және ирригация министрліктерінің, түрлі өңірлер мен аудандар әкімдіктерінің, АӨК саласындағы қаржы институттарының, инвестициялық жобалардың басшылары, фермерлер мен отандық техника мен суару жүйелерін өндірушілер бас қосып, өз өңірлерінде тиімді суару жобаларын енгізу кезіндегі перспективаларды, мүмкіндіктер мен қиындықтарды талқылады.
«Мемлекет басшысы 2023 жылғы Жолдауында мемлекет пен бизнес арасындағы табысты әріптестіктің бұл үлгісін атап өтіп, негізгі азық-түлік өнімдері бойынша елдің импортқа тәуелділігін төмендету үшін оны ауыл шаруашылығының басқа салаларында қолдануға тапсырма берді. Биыл Үлкен жоба бойынша көкөніс сақтау қоймаларын, құс фабрикаларын салу мен суару, мал шаруашылығы жобаларын іске асыруға 100 млрд теңге көлемінде қаржыландырудың екінші траншы бөлінді. Бүгін біз кеңеске жұмыс істеп тұрған және әлеуетті отандық суару жүйелеріне арналған жабдықтарды өндірушілерді, суару жобалары бойынша тәжірибесі бар фермерлерді шақырдық. Жаңбырлату техникасы мен тамшылатып суару жүйелерін таңдау кезінде отандық өндірушілерге артықшылық беру қажет. Бізде Metzer Kazakhstan, BNK irrigation, Samal commodities, «Келет» АҚ сынды табысты кәсіпорындар бар», — деп атап өтті Серік Жұманғарин.
Суару әдiстерi – табиғи су айдындарынан су жеткiзу немесе жасанды су қорларын салу. Ауыл шаруашылығы вице-министрі Аманғали Бердалиннің айтуынша, биыл Қазақстанда 1,58 млн га суармалы жер игеріледі. Оның ішінде 1,1 млн га немесе 74%-ы жер үсті тәсілімен суарылады, 97,9 мың га – бұл күріш алқаптарын суға бастыру, 227,3 мың га немесе 14,3%-ы, заманауи жаңбырлатып суару жабдықтары пайдаланылады, 97,9 мың га немесе 6,2%-ы – тамшылатып суарылады.
«Соңғы 5 жылда ел аумағында су үнемдеу технологияларын қолданатын суармалы жерлердің ұлғаюы байқалады. 2019 жылдан бастап мұндай аумақ 33%-ға ұлғайып, 210,6 мың гектардан 279,6 мың гектарға дейін жетті. 2023 жылы бұл көрсеткіш 312,2 мың гектарға дейін жеткізілді», — деді Аманғали Бердалин.
Су ресурстары және ирригация вице-министрі Нұрлан Алдамжаров атап өткендей, бүгінде ауыл шаруашылығының суды тұтыну үлесі жалпы суды пайдаланудың 65%-ын құрайды. Барлық су тұтынудың 97%-ы немесе ел бойынша барлық суармалы алқаптың 78%-ы немесе жалпы аумағы 1,4 млн га суармалы жері бар елдің оңтүстігіндегі Алматы, Жетісу, Жамбыл, Түркістан және Қызылорда облыстарына тиесілі. Суармалы егістік суды тиімді пайдаланудың төмен коэффициентімен сипатталады. Судың негізгі шығыны да осы салаларда орын алады.
«2023 жылдың қорытындысы бойынша 1,8 млн гектар суармалы жердің 17%-ына (312 мың га) ғана су үнемдеу технологиясы қолданылады, бұл расымен өте төменгі деңгей», — деп атап өтті су ресурстары және ирригация вице-министрі.
Жиында отандық және шетелдік өндірушілер суару жүйелері мен жабдықтардың өндірістік мүмкіндіктері мен технологиясын таныстырды. BNK Irrigation жаңбырлату машиналарын жасаумен айналысады. Зауыт Түркістан облысында орналасқан. Биыл ӘКК-мен бірлесіп жаңбырлату машинасының әрбір түйіскен жерін роботтар дәнекерлейтін жаңа автоматтандырылған цех іске қосылды. Зауыт жылына 1000 машинаға дейін шығаратын қуаттылыққа ие. 2024 жылы тағы бір цехты іске қосу жоспарланған, онда мырыштау желісі салынады. Компания өкілі Ниязәлі Бейсенбаев атап өткендей, бұл суаруға қажеттінің барлығын өндіріп, суару жобаларын іске қосатын Қазақстандағы жалғыз кәсіпорын.
