Қасым-Жомарт Тоқаев азаматтардың табысы азайып, экономиканы қолдауға бағытталған қаржыны жымқыру тәуекелі артқан кезінде сыбайлас жемқорлыққа қарсы күресті күшейту қажеттігін атап өткен болатын. Осы бағытта Арыс қаласының әкімдігінің кіші мәжіліс залында қала әкімі Гүлжан Құрманбекованың төрағалығымен Арыс қаласы әкімдігі жанынандағы сыбайлас жемқорлыққа қарсы іс-қимыл мәселелері жөніндегі комиссия отырысы өтті. Мәжіліске Арыс қалалық мәслихат төрағасы Қайрат Ахметов, комиссия мүшелері, аппарат қызметкерлері, бөлім басшылары, ауылдық округ әкімдері қатысты. Күн тәртібінде «Сыбайлас жемқорлыққа қарсы іс-әрекет бойынша заңдылықтың, тәртіптің сақталуы және қабылданып жатқан шаралардың жай-күйі және ағымдағы жылда бюджеттен бөлінген қаржыларды, оның ішінде мемлекеттік тапсырысты қалыптастыруға бөлінген бюджеттік қаражатты ұтымды пайдалану туралы» қалалық ішкі саясат бөлімінің басшысы Жомарт Тұрсымбеков баяндама жасаса, «Жергілікті бюджеттен қаржыландырылатын атқарушы органдарға ведомстволық бағынысты квазимемлекеттік сектор субъектілерімен (комплаенс қызметі) сыбайлас жемқорлыққа қарсы іс-қимыл шараларының нәтижесі туралы» туралы Арыс қаласының тұрғын-үй коммуналдық шаруашылық, жолаушылар көлігі және автомобиль жолдары бөлімі басшысы Қазыбек Ақылбай баяндама жасады.
Сондай-ақ, Арыс қаласы әкімдігі жанынандағы құқық бұзушылық профилактикасы жөніндегі ведомствоаралық комиссияның мәжілісі болды. Күн тәртібінде «Жол көлік оқиғаларының профилактикасы, оның ішінде адам өліміне алып келген оқиғалардың алдын алу» және екінші мәселе «Меншікке қарсы қылмыстық құқық бұзушылықтардың алдын алу туралы (мал, пәтер ұрлықтары, алаяқтық, қарақшылық, тонау және т.б.).» туралы Арыс ауданының полиция бөлімі бастығының бірінші орынбасары Омархан Алхожаев және «Отбасы-тұрмыстық қарым-қатынастар саласындағы құқық бұзушылықтардың профилактикасы» жөнінде Арыс қаласының жұмыспен қамту және әлеуметтік бағдарламалар бөлімінің «Асыл жүрек» әлеуметтік орталығының басшысы Ермек Сқақов баяндама жасады. Баяндамашыларға сұрақтар қойылып, заң аясында тиісті жауаптар берілді.
Сонымен қатар, қала әкімі Гүлжан Құрманбекованың төрағалығымен 2022-2023 оқу жылының аяқталуына орай, балалардың жазғы демалыс кезіндегі қауіпсіздік шаралары бойынша мәжіліс өтті. Мәжіліске Арыс ауданының прокуроры Талғат Сейдуалиев, қала әкімінің орынбасары Алмаз Сұлтанов, Арыс аудандық полиция бөлімі бастығы Алмас Мырзахметов, ауылдық округ әкімдері, мектеп директорлары қатысты.
Күн тәртібінде 2022-2023 оқу жылын аяқтау, кәмелетке толмағандар арасындағы құқық бұзушылықтың алдын алу туралы және жазғы демалыс кезінде балалар қауіпсіздігінің алдын алу мен шектеу шаралары, осы мақсатта қоғамдық тәртіпті қамтамасыз ету, шомылу маусымында су айдындарындағы балалар қауіпсіздігінің алдын алу бойынша тиісті сала басшылары баяндама жасады.
Қала басшысы балалардың жазғы демалыс кезіндегі қауіпсіздігін қамтамасыз ету басты назарда болу керектігін жеткізді.
«Жеткіншектердің даладағы жүріс-тұрысы ерекше қадағалауда болғаны дұрыс. Балаларға тыйым салынған жерлерге шомылу, заңсыз көлік шерулерін ұйымдастыру, тыйым салынған жерлерге алау жағу қауіпті екенін түсіндіру қажет. Кез келген ата-ана аталған ескертулерге құлақ асып, балаларымен дұрыс әңгімелессе, онда жазғы демалыс мерзімі оқушылар үшін тамаша демалыс болатынына сенім зор», – деді Гүлжан Мамытқызы.
Сондай-ақ, мектептерде қысқы жылыту маусымына дайындықты осы кезден қолға алып, тиісті жұмыстар жүргізу қажеттігін атап өтті.
Бұдан бөлек, патруль нарядтары қалалық жағажайлар, су айдындары және азаматтардың басқа да көпшілік демалатын орындары жанында кезекшілікті күшейтуді тапсырды. Айта кетейік, биыл Арыс қаласы көлемінде жалпы орта білім беретін мектепті 1 096 оқушы аяқтайды. Оның ішінде жалпы 220 бітіруші «Алтын белгіге», 116 бітіруші үздік аттестатқа үміткер. Одан бөлек, әлеуметтік осал топқа жататын отбасынан шыққан балаларды қолдау бойынша 2022-2023 оқу жылы жазғы демалыс лагерлерімен 743 баланы қамтамасыз ету жоспарлануда.
Бұдан бөлек, Арыс қаласында мүгедектігі бар азаматтардың әлеуметтік нысандарға қолжетімділігін зерделеу үшін мониторинг жұмыстары жүргізілуде. Бұл жұмыстарды қала әкімі Гүлжан Құрманбекованың өкімімен құрылған арнайы жұмысшы топ жүргізуде. Олар барлық жерге тексеру жүргізуде: пандустардың бар-жоғы, олардың көлбеу бұрышы, ені, кіреберіс есіктердің стандарттарға сәйкестігі және тағы басқа басты талап болды. Мониторинг мемлекеттік органдарда, халыққа қызмет көрсету орталықтарында, сауда дүкендерінде, медицина объектілерінде және басқа жерлерде жүргізілуде. Мониторинг барысында кейбір ұйымдарда кіреберіс есіктер мен пандустарды өлшеу кезінде бірқатар қолайсыздық анықталды. Бұл бойынша әр мекеменің жауапты басшылығына арнайы ескерту хаттары жолданып, кемшіліктерді мерзімінде қалпына келтіру керектігі ескертілді. Айта кетейік, мониторинг тобының құрамында қалалық жұмыспен қамту және әлеуметтік бағдарламалар бөлімінің, құрылыс, сәулет және қала құрылысы, «AMANAT» партиясы Арыс қалалық филиалының өкілдері бар. Мониторингтің мақсаты – ерекше қажеттіліктері бар адамдардың өмір сүру сапасын арттыру және халықтың мобильділігі төмен топтары үшін кедергісіз орта құру болып табылады.
