Сыбайлас жемқорлыққа қарсы іс-қимыл – мемлекеттік саясаттың басым бағыттарының бірі. Бұл бағытта мемлекеттік қызметшілерге жүктелер жауапкершілік ерекше. Себебі мемлекеттік аппараттың ашықтығы мен тиімділігі, ең алдымен, қызметшілердің адалдығы мен заң талаптарын сақтауына байланысты.
Мемлекеттік қызметшілер сыбайлас жемқорлыққа қарсы іс-қимыл нормаларын қатаң сақтауға міндетті. Бұл нормалар Қазақстан Республикасының заңнамасында, соның ішінде «Сыбайлас жемқорлыққа қарсы іс-қимыл туралы» Заңда нақты айқындалған. Аталған талаптар қызметтік өкілеттіктерді жеке мақсатта пайдалануға, заңсыз сыйақылар алуға, мүдделер қақтығысына жол бермеуді көздейді.
Мемлекеттік қызметші үшін басты қағидалардың бірі – адалдық. Қызмет барысында кез келген шешім заң аясында қабылданып, жеке немесе үшінші тұлғалардың пайдасына бұрмаланбауы тиіс. Сонымен қатар, қызметтік міндеттерді орындау кезінде туындауы мүмкін мүдделер қақтығысын дер кезінде хабарлау – әрбір қызметшінің міндеті.
Сыбайлас жемқорлықтың алдын алу тек тыйымдар мен жауапкершілік шараларымен шектелмейді. Бұл – ең алдымен, әрбір қызметшінің ішкі мәдениеті мен құндылықтарына байланысты. Осы тұрғыда адалдық қағидаттарын нығайту, парасаттылық мәдениетін қалыптастыру – маңызды міндеттердің бірі.
Азаматтармен жұмыс барысында ашықтық пен жариялылықты қамтамасыз ету де жемқорлық тәуекелдерін азайтады. Мемлекеттік қызметші қабылдаған шешімдері үшін әрдайым есеп беруге дайын болуы тиіс. Бұл – қоғам сенімін қалыптастырудың негізгі жолы.
Бүгінде мемлекеттік органдарда сыбайлас жемқорлықтың алдын алу мақсатында түрлі түсіндіру жұмыстары, семинарлар мен профилактикалық іс-шаралар тұрақты түрде өткізіліп келеді. Бұл шаралар қызметшілердің құқықтық сауаттылығын арттырып қана қоймай, олардың жауапкершілік деңгейін күшейтеді.
Қорытындылай келе, сыбайлас жемқорлыққа қарсы іс-қимыл – тек мемлекеттік органдардың ғана емес, бүкіл қоғамның ортақ міндеті. Ал мемлекеттік қызметшінің басты миссиясы – халыққа адал әрі әділ қызмет ету. Осы қағидатты ұстану арқылы ғана біз тиімді, ашық және сенімді мемлекеттік басқару жүйесін қалыптастыра аламыз.
Түркістан қаласы әкімі аппаратының басшысы, Әдеп жөніндегі уәкілі
Әлібеков Қуаныш Нұржанұлы
