2025 жылғы 12 маусымда Төлеби ауданы, Көксәйек елді мекеніндегі №9 Түркістан көпсалалы техникалық колледжінің АКТ залында ерекше тәрбиелік мәнге ие кездесу өтті. Бұл шара «Салауатты сана» жобасы аясында ұйымдастырылды және Қазақстан халқы Ассамблеясының жанындағы Төлеби аудандық Аналар кеңесінің бастамасымен жүзеге асырылды. Кездесу «Ақ жаулық — бейбітшілік белгісі» тақырыбында өрбіді.
Шараға Төлеби аудандық Аналар кеңесінің төрайымы А.Рахишова, кеңес мүшелері, колледждің ұстаздары мен студенттері қатысты. Бұл жиын — жастардың бойына ұлттық құндылықтар мен рухани-адамгершілік тәрбиені сіңіруге бағытталған маңызды іс-шаралардың бірі болды.
Кездесудің негізгі мақсаты — жастар арасында бейбітшілік, татулық, отбасылық құндылықтар мен ананың рөлін насихаттау, рухани жаңғыру аясында ұлттық тәрбиенің мәнін түсіндіру болды. Аталған тақырыптың өзектілігі — бүгінгі заманда ұлттың бірлігін, рухани біртұтастығын сақтау үшін аналардың, отбасындағы әйел азаматтардың ықпалы зор екенін мойындауға негізделеді. А.Рахишова ханым өз баяндамасында қазақ әйелі бейнесін, оның қоғамдағы рөлін, тарихтағы орнын кеңінен баяндап өтті. Әсіресе «ақ жаулық» ұғымының қазақ дүниетанымындағы киелі, терең мағынасын түсіндіріп берді. Ақ жаулық — тек тұрмыстық бұйым ғана емес, ол — ана мейірімі мен даналығын, отбасындағы тәрбие мен тыныштықтың, бейбіт өмірдің нышаны екенін атап өтті.
Шара барысында ұстаздар тарапынан шағын ән шашу ұсынылып, ұлттық әуендер арқылы кездесудің атмосферасы жылылыққа толы болды. Жастармен жүргізілген еркін сұхбат, ашық пікір алмасу барысында студенттер өз ой-пікірлерін айтып, отбасылық тәрбие, ұлттық құндылықтар туралы пікірлерімен бөлісті. Аналар кеңесі мүшелері жастарға өз өмірлік тәжірибелерінен мысалдар келтіріп, ақыл-кеңестерін айтты. Ұлы мұратты іске асыруда Қазақстан халқы Ассамблеясы жанындағы Аналар кеңесінің үлесі зор. Ел ішінде ынтымақ пен ырысты тірліктің орнауына қызмет ететін бұл кеңес – бүгінгі күннің өрелі міндеттерін атқаруда, әсіресе рухани-адамгершілік тәрбие, отбасылық құндылықтарды дәріптеу және ұлттар арасындағы бейбіт тірлікті сақтау бағытында ерен еңбек етіп келеді.
Кездесуден кейін студенттер үлкен әсер алғандарын білдіріп, осындай мазмұнды кездесулер жиі өткізіліп тұрса деген тілектерін жеткізді. Бұл — жастардың қоғамдағы рухани құндылықтарға, отбасылық тәрбиенің маңызына мән беріп келе жатқанын көрсетті. Әр халықтың болашағы – жас ұрпақтың бойында. Аналар кеңесі ассамблея арқылы елдің рухани және ұлттық идеологиясын дамытып, халықаралық мақсаттарға қол жеткізуге үлес қосты.
Түркістан облысындағы Аналар кеңесі — Қазақстан халқы Ассамблеясы жанындағы маңызды қоғамдық құрылымдардың бірі. Бұл кеңес ұлттың ұйытқысы саналатын аналардың қоғамдағы белсенділігін арттыру, ұлттық құндылықтарды сақтау, отбасылық тәрбие мен салт-дәстүрді насихаттау жолында ауқымды жұмыстар атқарып келеді. Кеңес облыстың барлық аудан-қалаларында жұмыс істейді. Әсіресе Төлеби, Сайрам, Ордабасы, Қазығұрт сияқты аудандарда кеңес жұмысы жүйелі жүргізіліп келеді. Аналар кеңесі мүшелері — өмірлік тәжірибесі мол, қоғамда беделді, көп балалы аналар, ардагер ұстаздар мен қоғамдық белсенділерден құралған.
Олар ел ішіндегі тұрақтылықты, ұлтаралық татулық пен қоғамдық келісімді сақтауға белсенді атсалысып келеді. Әр түрлі деңгейде өткізілетін кездесулер, дөңгелек үстелдер, шеберлік сағаттары мен қайырымдылық шаралары — кеңестің күнделікті жұмыс форматына айналған. Сонымен қатар жас отбасылармен, мектеп пен колледж оқушыларымен, жастар ұйымдарымен тығыз байланыс орнатылып, тәрбиелік мәні зор іс-шаралар жүйелі түрде өтіп тұрады.
Кеңестің тағы бір маңызды бағыты – жастар тәрбиесіне басымдық беру. Түркістан қаласында, сондай-ақ аудан, ауылдарда ұйымдастырылған кездесулерде Аналар кеңесінің мүшелері жас қыздармен бетпе-бет сөйлесіп, өмірлік тәжірибелерімен бөліседі. Олар қыз бала тәрбиесін отбасының ғана емес, тұтас ұлттың аманатына балап, әрбір жасқа жеке көңіл бөледі. «Ибалы қыз – елдің көркі», «Ана мен бала – ұлттың негізі» атты іс-шаралар жастардың өмірлік таңдауларын, тұлғалық дамуын ұлттық құндылықтармен үйлестіруге бағытталған.
«Ақ жаулық — бейбітшілік белгісі» тақырыбындағы бұл кездесу — жастардың санасына ананың бейнесі арқылы бейбіт өмірдің маңызын ұқтыруға, отбасылық құндылықтарды дәріптеуге бағытталған тағылымды шара болды. Мұндай кездесулер рухани даму мен ұрпақ тәрбиесінде үлкен рөл атқарады. Аналар кеңесінің ұйымдастырып жүрген бұл сынды іс-шаралары — ел болашағы саналатын жастардың бойында ұлттық рухты, адамгершілік қасиеттерді қалыптастырудың жарқын көрінісі. Бейбітшілік пен келісімді, татулық пен тәрбиені ту еткен аналардың игілікті істері ел болашағына қосылған өлшеусіз үлес деуге толық негіз бар.
