
Елімізде тауарлық балық өсіру саласында Түркістан облысы жетекші өңірлердің қатарында. Аймақта балық шаруашылығын дамытуға, жаңа өндіріс орындарын ашуға және отандық өнім көлемін арттыруға ерекше көңіл бөлінуде. Осы бағыттағы жұмыстармен танысу мақсатында Түркістан облысының әкімі Нұралхан Көшеров Төлеби ауданына жұмыс сапарымен барып, Киелітас ауылдық округіне қарасты Достық ауылында орналасқан «Fish House» ЖШС-нің жұмысын көрді.
Өңір басшысы кәсіпорынның өндірістік әлеуетімен танысып, балық өсіру технологиясы мен алдағы даму жоспарларын тыңдады. Кездесу барысында балық шаруашылығын дамытуға мемлекет тарапынан бірқатар жеңілдіктер мен субсидиялар қарастырылғанын атап өтіп, сала кәсіпкерлеріне қолдау көрсетілетінін жеткізді.
Кәсіпорын иесі жеке қаражаты есебінен 600 млн теңге инвестиция салып, форель, сазан, ақ амур және бекіре балықтарын өсіруді қолға алған. Шаруашылық 2024 жылдың күзінде құрылып, 2025 жылдың шілде айында іске қосылған.
Кәсіпорынның негізгі қызметі – балықты уылдырықтан бастап, дайын тауарлық өнімге дейін өсіру. Өндірістік қуаты жылына 300 тоннаға дейін балық өндіруге мүмкіндік береді. Қазіргі таңда мұнда 20 адам тұрақты жұмыспен қамтылған. Алдағы жылы жұмысшылар санын 30 адамға дейін арттыру жоспарланып отыр.
Бүгінде кәсіпорын өндірісіне қажетті балық шабақтары Өзбекстан Республикасынан, ал форель уылдырығы Польша мен Даниядан жеткізіледі. Балық азығына қажетті жем өнімдері де шетелдік және отандық жеткізушілерден арнайы тапсырыспен алынады. Атап айтқанда, Польшадағы «Aller» фирмасынан, Қырғызстандағы «Салих Аква» компаниясынан және Алматы қаласындағы «Аква Альянс» мекемесінен жеткізіледі.
Қазіргі уақытта шаруашылықтағы балық қоры 230 тоннаны құрайды. Оның ішінде 150 тоннасы – сазан, 40 тоннасы – форель, 30 тоннасы – бекіре және 10 тоннасы – ақ амур. Бұл көрсеткіш кәсіпорынның өндірістік әлеуеті мен балық өсіру бағытындағы жұмыстарының ауқымын аңғартады.
Алдағы уақытта кәсіпорын өндірісті кеңейтіп, импортқа тәуелділікті азайтуды көздеп отыр. Осы мақсатта еркін экономикалық аймақ аумағында отандық балық жемін өндіретін зауытты іске қосу жоспарланған. Сонымен қатар форель уылдырығын жергілікті жерде өндіруді жолға қою көзделуде. Бұл бастамалар жүзеге асқан жағдайда шабақ өсіруден бастап, дайын тауарлық өнім шығаруға дейінгі толық өндірістік цикл қалыптасады.
Айта кетейік, 2025 жылы кәсіпорын балық шаруашылығы саласындағы жетістіктері үшін «Ең үздік балық өндіруші» дипломымен марапатталған. Бұл – шаруашылықтың өндірістік қызметіне берілген марапаттардың бірі.
Жалпы, Түркістан облысында балық шаруашылығын дамыту бағытында жүйелі жұмыстар жүргізілуде. Өңір бойынша 2030 жылға дейін тауарлық балық өсіру көлемін 20 мың тоннаға жеткізу межеленген. Биылғы жоспар 9 123 тоннаны құраса, қазіргі таңда оның 3 106 тоннасы орындалған.
Балық шаруашылығының дамуы тек ауыл шаруашылығы өндірісінің көлемін арттырумен шектелмейді. Бұл бағыт ауыл тұрғындарын тұрақты жұмыспен қамтуға, кәсіпкерлік белсенділікті арттыруға, жергілікті бюджет кірісін молайтуға және азық-түлік қауіпсіздігін қамтамасыз етуге де ықпал етеді. Әсіресе, өндірістік қуаты жоғары кәсіпорындардың іске қосылуы ауылдық аумақтардың экономикалық әлеуетін көтеруге жол ашады.
«Fish House» секілді өндіріс орындарының кеңеюі өңірде балық өнімдерін өндірумен қатар, жем дайындау, шабақ өсіру, өңдеу және өткізу бағыттарындағы жаңа кәсіптердің қалыптасуына мүмкіндік береді. Нәтижесінде Түркістан облысының ішкі нарықты отандық өніммен қамтамасыз ету әлеуеті артып, экспорттық мүмкіндіктерін кеңейтуге де негіз қаланады.
