Ортамызда жүрген қарияларымыздың бір кезде елі, халқы, келешек ұрпағы үшін жасаған игі істері ерекше орын алады. Қазіргі кезде елімізде қарттарға үлкен мән беріп, оларға айрықша көңіл аударылып, үкімет тарапынан жан-жақты қамқорлық жасалуда. Біздің бейбіт өмірде еркін тыныш өмір кешуімізге өз үлестерін қосқан осынау ардақты қарттарымызға қандай құрмет көрсетсек те жарасады. Ардагерлеріміздің саналы ғұмырын Отан деп, тынымсыз еңбектерімен мемлекетіміздің негізін салуға жол ашқан өмір жолы бүгінгі ұрпаққа табылмас қазына.
“AMANAT” партиясының “Ардагерлерді ардақтайық”, “Кедергісіз келешек”, “Халыққа көмек” партиялық жобалары аясында Жеңіс күні құрметіне орай партияның Төлеби аудандық филиалы мен “Ленгір қалалық емханасы” ШЖҚ МКК қызметкерлері бірігіп, ардагерлерді ардақтау шараларын ұйымдастырды. Ленгір қалалық емханасының терапевт, эндокринолог, невропатолог дәрігерлері, психолог, әлеуметтік қызметкер және Салауатты өмір салтын насихаттау бөлмесінің мамандары Ленгір қаласындағы қозғалысы шектеулі ардагерлер мен оларға теңестірілген тұлғалар және еңбек майданының еңбеккерлерінің үйлеріне барып медициналық профилактикалық тексеру жүргізді. Қарт ардагерлердің қандағы қант мөлшері мен холестерин, күретамырлы қысымын тексерді. ЭКГ жасады, барлық қажетті талдаулар алынды. Сондай-ақ, үй жағдайында медициналық тексеру жүргізді, әңгімелесу барысында ардагерлердің қойған сұрақтарына жауап беріп, денсаулық күтіміне байланысты ұсыныстар айтылды.
Айта кетейік, сонымен қатар, аталған емхана басшылығымен бірге партияның аудандық филиалы “Ардагерлерді ардақтайық”, “Бақытты отбасы”, “Халыққа көмек”, ” Құқықтық көмек” және “Кедергісіз келешек” партиялық жобалары аясында “Ашық есік” күнін өткізді. Онда “AMANAT” партиясы Төлеби аудандық филиалының Атқарушы хатшысы Қуанышбек Қансейітов, емхана басшысы Алимхан Шалқаров және аудандық мәслихаттағы фракция мүшелері, депутаттар қоғамық қабылдау өткізіп, келушілердің өтініш-тілектеріне құлақ түрді. Ал емхана ұжымы, дәрігерлер денсаулығына байланысты шағым айта келгендерді тиісті тексерулерден өткізіп, хирург, травматолог, кардиолог, неврапатолог, онколог, стоматолог, эндокринолог, отоларинголог, офтальмолог, инфекционист, дерматолог дәрігерлері, УДЗ, Спирография, ЭКГ т.б барлық медициналық қызметтерді кезексіз, жолдамасыз медициналық көмек көрсетті. Ардагерлер мен емханаға келген науқастар осынау игі істің басы-қасында жүрген “AMANAT” партиясы Төлеби аудандық филиалының Атқарушы хатшысы Қуанышбек Қансейітовке, қалалық емхана басшысының орынбасары Ғалым Қабылбековке және медицина қызметкерлеріне көрсеткен қамқорлығы мен қолдауы үшін алғыстарын білдірді.
“AMANAT” партиясы Түркістан облыстық филиалының баспасөз қызметі
