Түркістан облысы, Түлкібас ауданына келін болып түскен оңтүстіккореялық Суджин Ли жайында әлеуметтік желілерде аз айтылған жоқ. Бүгінде қазақ жеріне бауыр басып, салт-дәстүрін меңгере бастаған келінге әулеті дән риза.
Корей қызымен отау құрған жігіттің есімі – Сәкен. Оңтүстік Кореяда 5 жыл жұмыс істеген ол жұбайымен сол жақта танысыпты. Сөзінше, достықтан басталған сезім махаббатқа ұласыпты. Ал ата-аналары жастардың бірге болуына қарсылық танытпаған. Тіпті дәстүр бойынша беташар өтіп, некелері мешітте қиылған.
– Ата-анасын көріп, таныстым. Сосын рұқсатын берген соң елге алып келдім. Ал әйелім өзі корей тілін үйретті, – дейді Сәкен Бауыржан.
Бүгінде Суджин жұбайымен бірге Түлкібас ауданында тұрады. Ет асу және бауырсақ пісірудің қыр-сырын абысындары мен енесі үйретеді екен. Өзінің айтуынша, үйлену туралы ұсыныс жасағанда қатты қобалжыпты. Себебі қазақ тілін мүлдем білмейді екен. Ал енесі корейлік келінінің қазақ тілін меңгеруге деген ынтасы үлкен екенін айтады.
– Шәй ішіңіздер деп шақырады. “Апа” деп ізет танытып тұрады. Ал кішкентай балаларды бірден ойнатып кетеді. Қазақтың тағамына да үйренді, – дейді Нағима Мақұлбекова.
Қайынатасы Бауыржан Мақұлбеков келіннің сәлем салып, ата-енеге иіліп тұратынын айтып, ризашылығын жеткізді. Сондай-ақ ол құжаттар жағы қиындық туғызып жатқандығын айта келе, елшіліктен көмек болса деген өтінішін де жеткізді. Ақсақалдың айтуынша, келіннің құжаттары реттелсе, кореялық құдаларды шақырып дүркіретіп той өткізбек.
