Ағымдағы жылдың 20 ақпан күні Түлкібас ауданының адами әлеуетті дамыту бөлімінің әдістемелік кабинетінің қазақ тілі мен әдебиеті пәнінің әдіскері Г.Оразбаеваның жылдық жоспарына сәйкес, “Жанкент” жалпы орта мектебінің базасында аудандық «Тарих өткелдеріндегі қазақтың үш биі» атты сахналық көрініс байқауы болып өтті.
Байқау Төле бидің 360 жылдығы, Қазыбек бидің 355 жылдығы және Әйтеке бидің 340 жылдығына арнайы ұйымдастырылған. Байқауға 20 жалпы білім беру ұйымдарынан шығармашыл, шешендік өнерді, тілді меңгерген оқушылардан құралған командалар қатысты.
Қазақ тарихында елеулі із қалдырған, шешендіктің шыңына шыққан, ақылымен көпшілік елді аузына қаратқан, билердің биі атанған бабаларымыздың өсиетін орындау, кемеңгер бабаларымыздың қасиеттерін халық арасында насихаттау мақсатында өткен байқауға аудан мектептерінің 7-10 сынып оқушылары қатысты.
Оқушылар байқаудың алғашқы кезеңінде команданы таныстырып, билердің шешендік сөздері мен даналық өсиеттерін айтса, екінші кезеңде тақырыпқа қатысты би-әнмен кіріктірілген үш бидің өмірінен сыр шертетін, даналық сөздерін негізге ала отырып сахналық көріністерін көрсетті.
Қазылар алқасы оқушылардың сөз сөйлеу шеберлігіне, шешендік сөздерді жатқа білуіне, сахна мәдениетіне, киім үлгісіне баса назар аударды.
Нәтижесінде Ә.Молдағұлова атындағы мектебінің оқушылары жеңімпаз атанып, аталған байқаудың ақпанның 24-не өтетін облыстық кезеңіне жолдама алды.
