Алғыс айту күніне орай, Түркістан облысындағы этнос ақсақалдары Қожа Ахмет Ясауи кесенесінде болып, онда жерленген хан-сұлтан, билер мен барша игі жақсылардың рухына Құран бағыштап, дұға жасады. Ізгі шараға қатысушылардың қатарында облыстық этномәдени бірлестіктер мен қоғамдық кеңес өкілдері де болды.
Алдымен этнос ақсақалдары Қожа Ахмет Ясауи кесенесінің «Мүсәллә» қақпасы тұсында жан-жақтан жиылып, қол беріп, төс қағыстырып амандасты. Аталған қақпа арқылы кесене алдына дейін жаяу жүріп өткен олар рухани құндылықтар төңірегінде салиқалы әңгіме өрбітті.
Игі шара барысында кесене ішінен имам шығып, ақсақалдарды қарсы алып, бәрі бірге кесене ішіне енді. Ақсақалдар хан, билердің құрметіне қойылған әр құлпытастың жанына барып, олардың ерліктері, елге жасаған қызметтері жайлы пікірлерімен бөлісті. Бұдан соң, түркі әлемінің ұлы ойшылы, рухани ұстазы Қ.А.Ясауидің қабірі басында Құран бағышталды.
Құранның батасында қазақ ақсақалы Өтепберген Қуанышбай Алланың нығметі мен хандарымыз бен сұлтандарымыздың, батыр бабаларымыздың, абыз, би-шешендеріміздің ерлігі үшін алғыс айтты.
– Көгімде қыран ұшырған,
Жақсының бәрін ұсынған.
Жәрдемін берген Ұлы Ием,
Кезімде сөзден қысылған,
Жаратқан Хаққа мың алғыс!
Сынаққа қанша төздім мен,
Қиыр әлемді кездірген,
Бүгінгі балғын ұрпаққа,
Еркіндік дәмін сездірген,
Тәуелсіздікке мың алғыс!
Кірлетпей өткен жаулығын,
Аналарыма мың алғыс!
Арқалап өткен тау жүгін,
Бабаларыма мың алғыс!
Қадірлей білген барлығын,
Балаларыма мың алғыс!
Қыранда болып ұшқанмын,
Төнсе де қатер тұстан мың.
Тәуелсіз, еркін күн туып,
Алмастай өткір ұшталдым.
Көпұлтты, тату ел болып,
Ынтымағымды құшқанмын,
Я, Алла жолын жарқын ет,
Қырандай еркін Елімнің,
Бұл Жаңа Қазақстанның! – деп мәнді де мазмұнды бата берді көпті көрген дана қарт.
Сондай-ақ қариялар әлемде соғыс оты тұтанбауын тілеп, елімізде тыныштық заман, бейбіт өмір болсын деп дұға етті.
Айта кетейік, Түркістан облысында 1 наурыз – Алғыс айту күніне орай онкүндік басталған болатын. Мерекелік іс-шаралармен айшықталатын әр күн адамдарды ынтымақ пен бірлікке, татулыққа шақырады.
