Бүгін Отырар ауданының әкімі Сәкен Сұлтанханов Аққұм ауылының тұрғындарымен кезекті рет кездесіп, жергілікті халықтың мұң-мұқтаждарын тыңдады. Кездесуде аудан басшысы алдымен бұған дейін тұрғындар тарапынан айтылған ұсыныс-пікірлер мен өтініштердің орындалуы туралы баяндап берді.
Айта кету керек 2022 жылдың 8 сәуір күні Аққұм ауыл округі тұрғындарымен кездесу жиынында 9 мәселе көтеріліп, аталған мәселелердің 5-еуі оң шешімін тапса, қалған 4 мәселе орындалу үстінде. Атап айтқанда, ауыл тұрғындары Нұрбол Омаров, Шерахан Бөрібек, Алмас Досалиев секіл азаматтардың айтқан өтініштеріне орай Сырдария-Түркістан паркі мекемесінен рұқсат алынып, «Көккөл» каналының арнасы арнайы техникамен ашылды. Мұнан бөлек Аққұм ауыл округі бойынша мүйізді ірі қара және уақ малдарға ТО АШБ «Ветеринариялық қызмет» ШЖҚ МКК-нан бөлінетін малдың сырғалары жеткілікті беріліп, малдар 100% бірдейлендірілді. Ауыл округі бойынша 287 отбасының 127 отбасы жеке ауыз су құдығынан, ал қалған 160 отбасы ауылдың орталықтандырылған ауыз су жүйесінен ауыз суды пайдаланады. Қазіргі таңда 160 тұтынушының ауыз су жүйесіне есептегіш құрылғы орнатылды. Бүгінде ауыл тұрғындарына ауызсу күнделікті жеткілікті 8 сағат берілуде.
Аққұм ауылында бұдан өзге де игілікті істер жалғасын тауып келеді. Мәселен, осы жылы аудан бюджеті есебінен Лесбай Оспанов көшесіне 1066 метріне асфальт жол төселді. Сондай-ақ ағымдағы жылы Ж.Омаров көшесінің электр желілерін ауыстыру және Көккөл каналының 11 шақырымы мен Жамантал каналынының 6 шақырымына механикалық тазалау жұмыстарын жүргізу жоспарлануда. Алдағы 2 ай көлемінде Шекер Асанов көшесінің 180 метріне тас төселіп, Аманкелді көшесінің 80 метріне тас төселеді деп күтілуде.
Кездесу барысында көтерілген мәселелердің барлығы бақылауға алынып, оң шешімін тауып жатқаны халықты қуантты. Өз кезегінде ауыл қариялары ауылға тоқсан сайын кездесуге келіп, халық үніне құлақ асып, елдік мәселелерге етене жақын араласып жатқан басшыларға шынайы ризашылықтарын жеткізді.
Кездесуден соң аудан басшысы ауыл азаматтарын жеке мәселелері бойынша қабылдап, талап-тілектерін тыңдады. Қабылдауға келген азаматтар жауапты мамандар тарапынан заң аясынды кеңес алып, қойған сауалдарына ұщымды жауаптар берілді.
