Түркістан облыстық ҚХА жанындағы ақпараттық-насихаттық топ этнос өкілдері тығыз шоғырланған елді мекендерде кездесу өткізді, деп хабарлайды aptamedia.kz Түркістан облысы қоғамдық даму басқармасы “Қоғамдық келісім” КММ-нің баспасөз орталығына сілтеме жасап.
Кезекті кездесу Мақтаарал ауданы, Достық ауылдық округінде ұйымдастырылды.
Жиынға Түркістан облысының қоғамдық даму басқармасы “Қоғамдық келісім” КММ-нің және Түркістан облысының дін істері басқармасының «Дін мәселелерін зерттеу орталығы» КММ-нің жауапты өкілдері, Достық ауылдық округі әкімі аппаратының әскери есеп бойынша бас маманы, сондай-ақ, Мақтаарал аудандық Ассамблея жанынан құрылған Қоғамдық келісім кеңесі, Аналар кеңесі, Медиация кеңесі, этномәдени бірлестіктердің төрағалары мен мүшелері, аудандағы кәсіпкерлік палатасы, жұмыспен қамту саласы қызметкерлері, ауыл билері мен тұрғындары қатысты.
Күн тәртібіне сәйкес, “Агроөнеркәсіптік секторда прогрессивті технологияларды ілгерілету”, “Бүгінгі келісім – мәңгілік бейбітшілік” және әскери міндет саласындағы заңнамаларды орындау қажеттілігі тақырыптары бойынша қатысушылар өзекті мәселелерді талқылады.
Кездесуде сөз алған Түркістан облысының қоғамдық даму басқармасы «Қоғамдық келісім» КММ-нің этносаралық қатынастар саласы мониторингі және ақпараттық-насихаттық жұмыстарды ұйымдастыру бөлімінің басшысы Х.Исақов облыстық қоғамдық даму басқармасының жоспарына сәйкес атқарылып жатқан жұмыстар мен алдағы жоспарларды атап өтті.
Жиында Түркістан облысының қоғамдық даму басқармасы «Қоғамдық келісім» КММ-нің Мақтаарал аудандық филиалының басшысы Асан Ботабеков ел бірлігін нығайту бағытында өз ойын білдірді.
– Елімізде бейбіт шерумен басталып, лаңкестік топтардың террористік әрекеттеріне ұласқан қайғылы күндер Тәуелсіздік алған жылдардағы ең ауыр күндер болды. Шұғыл түрде әрекет жасаған Ел Президенті Қасым-Жомарт Тоқаев Парламент Мәжілісінің пленарлық отырысында жаңа Үкіметке елдің дамуына негізгі өзек болатын экономикалық саясат, өнеркәсіпті дамыту, ауыл шаруашылығын дамыту, мемлекеттік аппараттың жұмысын жетілдіру, білім, денсаулық сақтау, мәдениет, әлеуметтік қорғау жөніндегі өзекті мәселелерді шешу үшін нақты міндеттер жүктеді. Президент айтқандай, енді Қазақстанда дамудың жаңа кезеңі басталады. Егемен еліміздің дамуына үлес қосып, алдымызға қойған міндеттерді жүзеге асыруға белсене қатысып, Жаңа Қазақстанды бірге құрайық, ағайын! Тәуелсіздігіміздің басты құндылығы – бірлік пен келісімді көздің қарашығындай сақтайық, – деді филиал басшысы.
Достық ауылдық округі әкімі аппаратының әскери есеп бойынша бас маманы Нұрсұлтан Усербаев қазіргі таңда әскери борышын ерікті өтеушілердің қатары азайғанын, жастардың дені жалтарып, түрлі сылтаулар мен бармаудың жолын табатынын айтты.
– Мемлекет азаматтардың Отан алдындағы борышын өтеп, шыңдалып шығуына барлық жағдай жасап отыр. Ата Заңымыздың 34-бабында «ҚР қорғау – әр азаматтың қасиетті парызы әрі міндеті» екендігі тайға таңба басқандай көрсетілген. Бойындағы бұла күшін бір-біріне емес, елді қорғауға жұмсайтын жауынгерлер керек. Сонда ғана шекарамыз шегендеулі, шебіміз мықты ел боламыз. Бұл ретте, әскери міндетін атқарудан бас тартқан жастарға айыппұл төлеу заңда көрсетілген, – деді ол.
Сондай-ақ Түркістан облысының дін істері басқармасының «Дін мәселелерін зерттеу орталығы» КММ-нің теолог маманы Мақсат Салиходжаев, бейбітшілік пен келісім – адамзаттың асыл құндылықтарының бірі екеніне тоқталды.
– Бүгінгі таңда Қазақстанда бейбітшілік пен өзара келісімде 130-дан астам этнос тату-тәтті өмір сүруде. Республикамыз көпэтносты және көпконфессиялы қоғамнан тұрады. Қазақстан халқының татулығы, ынтымақтастығы, бейбітшілігі – біздің еліміздің ең басты байлығы. Оны көздің қарашығындай сақтауға тырысуымыз керек. Барлығымыз келешегіміздің, балаларымыздың жақсы болғанын қалаймыз. Бірлік, татулық, ынтымақ өз қолымызда. Сырттан келіп бізге ешкім үйретпейді. Тәрбиеге жіті көңіл бөліп, бірге жұмыс жүргізейік, – деді теолог маман.
Жиын соңында аудандағы этномәдени бірлестіктердің төрағалары мен мүшелері тақырыпқа сай өз ұсыныс-пікірлерін айтты.
Айта кетейік, ақпараттық-насихаттық топ Мақтааралдан бөлек Келес, Жетісай, Сарыағаш аудандарында да кездесу өткізді. Кездесу өзге де аудандарда жалғасады.
