ҚР Орталық сайлау комиссиясының төрағасы Нұрлан Әбдіров пен төрағаның орынбасары Мұхтар Ерман Түркістан облысына іссапармен келді. Сапар барысында Түркістан облыстық және Мақтаарал, Жетісай, Сарыағаш аудандары мен Кентау қаласының аумақтық сайлау комиссиясы мүшелерімен кездесу өткізді.
Жиында аумақтық сайлау комиссиясы төрағаларының сайлауға дайындық барысын пысықтап, бүгінгі күнге дейінгі атқарған жұмыстары жөнінде есебін тыңдады.
Түркістан облыстық аумақтық сайлау комиссиясының төрағасы Аңсар Өсербаев облыстық комиссияның әзірлігі жөнінде есепті баяндама жасады. Әрі қарай аудан-қалалардың аумақтық сайлау комиссиясы төрағалары өз аумақтарындағы сайлау өткізу бағытында ұйымдастырылған жұмыстарын баяндады.
Сондай-ақ, төраға орынбасары Мұхтар Тілдәбекұлы облыстық сайлау комиссиясының тарапынан 2024 жылы ұйымдастырылып, өткізілген сайлау жұмыстарына оң баға берді.
Кездесу барысында Нұрлан Мәжитұлы тағайындалған сайлауды заң аясында ұйымдастырып өткізуді тапсырды. Одан бөлек, сайлау учаскелерінің жабдықталуына баса назар аударуды, БАҚ өкілдерін тіркеуді, қоғамдық бірлестік өкілдерімен және жас сайлаушылармен тұрақты байланыс қалыптастыруды тапсырды.
Сонымен қатар, мүгедектігі бар азаматтарға қолайлы жағдай жасау, цифрлық құжаттармен жұмыс және сайлау күні орын алуы мүмкін түрлі жағдайлар кезінде комиссияның орындауы тиіс заңды іс-әрекеттерін түсіндіру мақсатында тәжірибелік әдістемелік сабақтарды жиі өткізуді жүктеді.
Түркістан облысының Өңірлік коммуникациялар қызметі
