Түркістан – тарихы терең, рухани астана ғана емес, бүгінде заманауи талаптарға сай қарқынды дамып келе жатқан өңірлік орталық. Қала келбетін жаңғырту, инфрақұрылымын жақсарту, тұрғындар мен қонақтар үшін қолайлы жағдай жасау мақсатында Түркістан қаласында ауқымды абаттандыру және көгалдандыру жұмыстары жүргізілуде. Соңғы жылдары Түркістан қаласында жаңа саябақтар мен демалыс аймақтары ашылып, барлығы заманауи стандарттарға сай абаттандырылды. Атап айтқанда: Орталық саябақ, Этноауыл аумағындағы жасыл желек алаңдары, Қожа Ахмет Ясауи кесенесі маңындағы тарихи аумақтар қайта жаңғыртылып, шағын сәулет формаларымен толықтырылды.
Мемлекет басшысы Қасым-Жомарт Тоқаев өз Жолдауында еліміздің экологиялық жағдайын жақсарту, қоршаған ортаны қорғау және халықтың экологиялық мәдениетін арттыру мақсатында «Таза Қазақстан» атты ауқымды ұлттық жобаны іске қосуды тапсырған болатын. Бұл бастама – тек сенбілік немесе тазалық акциясы ғана емес, ол — әрбір азаматтың табиғатқа, туған жерге деген жауапкершілігін арттыратын, қоғамның экологиялық ой-санасын қалыптастыруға бағытталған жүйелі шара.
Қала аумағын абаттандыру және көріктендіру бағытында «Жасыл Түркістан» коммуналдық мемлекеттік мекемесі тарапынан бірқатар жұмыстар атқарылуда. Осы тұста Б.Саттарханов даңғылы бойында, Павлин құс мүсіні мен «Арена» кешені маңында гүл отырғызу жұмыстары жүргізілуде. Сонымен қатар, көгал және арам шөптерден тазарту жұмыстары да қарқынды жүзеге асуда. Атап айтқанда, Эко базардың үшбұрышты аумағында, Павлин құсының маңында және Аэропорт тас жолы бойында арам шөптер орып, көгалдарды ретке келтіру жұмыстары жүргізіліп жатыр.
Ретке келтіру бағытында да бірнеше нысанда жүйелі жұмыстар атқарылуда. Б.Саттарханов даңғылы бойындағы «Нұрсәт» дәмханасының жанындағы ойын алаңы қалыпқа келтіріліп, жөндеу жұмыстары жүргізілуде.
Сондай-ақ, жол көрсету белгілерін жаңарту, жаяу жүргіншілер жолдарын жуу жұмыстары жүргізілуде. Аэропорт тас жолы бойындағы көпірге сырлау жұмыстары жасалып, қаланың эстетикалық келбетіне мән берілуде. Бұл аумақтарда орындықтар, жарық шамдары, су бұрқақтар, балалар және спорт алаңдары орнатылып, қалалықтардың бос уақытын тиімді өткізуіне жағдай жасалды.
Абаттандыру жұмыстары аясында Түркістан қаласында жол жиектері, жаяу жүргіншілер жолдары мен веложолақтар кеңейтіліп, жаңартылып келеді. 2024-2025 жылдарға арналған даму жоспарына сәйкес атқарылуда. Қалада 60-тан астам көшеге асфальт төселді. Тротуарлар мен веложолдар гранит таспен жабылып, жарықтандыру жүйелері орнатылды. Смарт-алаңдар мен QR-навигация жүйесі енгізілді.
Қаланы жасылдандыру – абаттандыру жұмыстары бойынша осы уақытқа дейін Түркістанда 500 мыңнан астам ағаш көшеті отырғызылды. Тамшылатып суару жүйесі енгізіліп, су үнемдеу технологиялары қолданыла бастады. Қала аумағында «Жасыл белдеу» құрылып, шаһардың микроклиматын жақсартуға бағытталған жұмыстар атқарылуда. Сонымен қатар, әр маусымда көпжылдық гүлдер мен декоративті өсімдіктер егіледі. Бұл қала келбетіне ерекше көрік беріп, туристердің де назарын аударуда. Жалпы абаттандыру шаралары Түркістан қаласын жасыл, қауіпсіз, қолайлы және тарихи-мәдени келбетімен үйлескен заманауи қалаға айналдыруға бағытталған. Бұл бағыттағы жұмыстар қала әкімдігінің бақылауында және алдағы уақытта да қарқынды түрде жалғасатын болады.
Айта кетейік, аталған бастаманың алғашқы кезеңінде еліміздің барлық өңірінде «Таза Қазақстан» экологиялық акциясы аясында сенбіліктер, көшелер мен өзен жағалауларын тазарту, ағаш отырғызу, қоқысты сұрыптап жинау сынды іс-шаралар белсенді түрде жүзеге асырылды. Ал облыста қазіргі таңда «Таза Қазақстан» республикалық экологиялық акциясы аясында кең көлемді шараларды ұйымдастырып, қоршаған ортаны қорғау мен экологиялық мәдениетті қалыптастыру бағытында елеулі ілгерілеулерге қол жеткізуде.