Мемлекет басшысы Қасым-Жомарт Тоқаевтың Жарлығымен Осыдан екі жыл бұрын 10 Ұлттық жоба тізбесі бекітілген болатын. Солардың бірі – Агроөнеркәсіптік кешенді дамыту жөніндегі ұлттық жоба.
2011-2025 жылдарға арналған ұлттық жобаны іске асыру нәтижесінде еңбек өнімділігін 2,5 есеге арттыру, отандық өндірістің негізгі азық-түлік тауарларымен қамтамасыз ету, өңделген өнім үлесін 70 пайызға дейін жеткізе отырып, агроөнеркәсіптік кешен өнімдерінің экспортын 2 есеге ұлғайту, сондай-ақ 7 ірі экожүйе қалыптастыру және инвестициялық жобаларды іске асыру есебінен 1 млн ауыл тұрғынының табысын тұрақты арттыруға қол жеткізу межеленіп отыр.
Осы орайда, таяуда, Түркістан облысы кәсіпкерлер палатасының директоры Асылан Ибадуллаев және Түркия Республикасы Ван қаласының сауда-өнеркәсіп палатасының төрағасы Недждет Таква ынтымақтастық жөніндегі меморандумға қол қойды. Тараптар кәсіпкерлік саласында тығыз байланыс орнатып, сауда-экономикалық қатынастарды дамытуға күш салуға келісім жасасты.
Алдағы уақытта екі ел компанияларының инвестициялық жобаларын жүзеге асыруда тікелей байланыс орнатуға жағдай жасау көзделіп отыр. «Turkistan» индустриалды аймағындағы шағын және орта бизнес субъектілерінің жұмысымен танысқан делегация өкілдері инвестор ретінде жаңа жобаларды қолға алуға ниетті.
Жоспарға сәйкес «Экобазарға» арнайы барған түркиялық меймандар кәсіпкерлік және өнеркәсіп басқармасының орынбасары Самат Көшкінбаймен жүздесті. Кездесуде Самат Жандарұлы құрылғанына 5 жыл толған облыстың экономикалық даму бағыты туралы атап өтті.
Түркістан өңіріндегі кәсіпкерліктің даму перспективасын жоғары бағалаған қонақтар кәсіпкерлердің тәжірибе алмасуы бағытында да байланыс орнатуға дайын. Екіжақты келіссөз нәтижесінде қос тарап кәсіпкерлердің семинарларға, курстарға немесе тағылымдамаларға қатысуын ұйымдастыруға жәрдемдесетін болады.
