Түркістан қаласында жол сапасын арттыру, жолаушылар жағдайын жақсартуда жүйелі жұмыстар атқарылуда. Қазіргі таңда, қалада аялдамалар саны 85-ке артты.
Олар: Тыныштықұлов, Б.Майлин, С.Марайым, С. Ерубаев, Қазыбек би, С.Талқанбаев, Тәуке Хан даңғылы, О. Жандосов көшелерінде жасақталды.
Одан бөлек, Т.Нышанов, Шекті тілеу Жолдаяқ, О. Жармұханбетов, Тараз, Ж.Майкотов, Қожа Ахмет Ясауи, Т.Бокин, Саққорған, Шойымбет би көшелерінде де қойылды.
Бүгінде Түркістан қаласында жыл өткен сайын қоғамдық көліктер жаңарып келе жатыр. Сәуір айында Түркістанда тұрғындардың өтініші бойынша тоғыз бағыттағы қоғамдық көлік қатынасы өзгертілді. Олар: 2А, 4, 4А, 5, 5А, 14, 18 31, 7 маршрутты қоғамдық көліктер. Түркістан қаласына былтыр 40 жаңа автобус келіп, 3 бағыт жаңадан ашылды. Қазіргі таңда, жоспарға сәйкес шаһарға 10 жаңа автобус жеткізілді. Бұл автобустар №1 бағытта қатынас жасап, тұрғындарға қызмет етеді. Бастапқыда жаңадан алынған автобустарды №6 қоғамдық көлік бағытына жүргізу жоспарланған болатын.
Осыған байланысты, жаңа автобустар №6 бағыттағы қоғамдық көліктердің жол жүру сызбасымен сынақтан (тест-драйв) өтті. Сынақ барысында аталған жаңа габаритті автобустар жол қауіпсіздігін сақтауға кері әсерін тигізетіні анықталды. Өйткені, автобустардың ұзындығы 10 метрді құрайды. Ал, №6 қоғамдық көлік бағытының Баянауыл, 1-мөлтек аудан аумағындағы жолы 5-6 метрден тұрады.Яғни, маршрут бойындағы ені қысқа көшелерде қатынас жасау және бұрылу қиындықтар тудырды. Ол өз кезегінде жол қауіпсіздігін сақтауға кедергі келтірді. Осыған байланысты, сынаққа қатысушылардың келісімімен жаңадан алынған автобустарды қолданыстағы қалаішілік №1 бағытқа жүргізіп, №1 бағыттағы қолданыстағы 8 метрлі автобустарды қалаішілік №6 бағытқа ауыстыруға шешім қабылданды.
Қазіргі таңда, қала бойынша тасымалдаушы жүзеге асырып жүрген 19 бағыттың 6-ы автобус бағыттары болып саналады. Қалғаны шағын автобус бағыттары. Қалаға жаңадан келген автобустар тасымалдаушылар есебінен алынуда. Осыған сәйкес, 2023 жылға қалаішілік №7,5,5А бағыттарындағы шағын автобустарды да жаңарту жоспарланды.
Еске салсақ, жақында Түркістан қаласындағы мәдени-рухани орталық аймағындағы «Керуен сарай» кешенінен Түркістан халықаралық әуежайына дейін №20 жаңа қалаішілік қоғамдық көлік бағыты ашылды. Бағыттың жалпы ұзындығы – 30 шақырым. Жол жүру уақыты мен жүру жиілігі – 50 минутты құрайды. Тұрғындар үшін 70 теңге көлемінде қолжетімді жол жүру тарифі белгіленген. Ұзындығы 8,5 метрді құрайтын заманауи автобустар электрондық билет жүйесімен, бақылау камераларымен, желдеткіш жүйесімен, сонымен қатар, мүмкіндігі шектеулі жандарға арналған орындармен, пандуспен жабдықталған.
