Түркістан қаласында есірткіге қарсы ауқымды шара ұйымдастырылды. Іс-шара барысында «Керуен сарай» ойын-сауық кешенін аралап жүрген қонақтар мен демалушыларға тегін арнайы парақшалар мен түсіндірме қағаздары үлестірілді. Шараны Түркістан қалалық Полиция басқармасының қызметкерлері мен Түркістан қалалық әкімдігінің ішкі саясат бөлімі және қалалық «Жастар ресурстық орталығы» мамандары бірлесіп өткізді. Аталған шараға қаламыздың еріктілер тобы мен жанашыр тұрғындары да жұмылдырылды.
Акцияның мақсаты – азаматтарды салауатты өмір салтын ұстануға баулу, оны насихаттау, қоғамды есірткіге қарсы қою, есірткіге қарсы иммунитетті барынша көтеру және есірткімен байланысты құқық бұзушылықтарға тосқауыл қою.
Іс-шара барысында Түркістан қалалық Полиция басқармасының қызметкерлері Түркістан қаласында орналасқан білім беру ұйымдарында жоғарғы сынып оқушыларына, жасөспірімдерге, студенттерге, ата-аналарға есірткінің заңсыз айналымына қатысудың құқықтық салдарын жеткізу және жаңа психоактивті заттардың таралуының алдын алу мақсатында жүйелі жұмыстар атқаруда. Осы орайда Түркістан қалалық Полиция басқармасының қызметкерлері мен қала әкімдігінің ішкі саясат және «Жастар ресурстық орталығы» мамандары бірлесіп, Отырар мөлтек ауданында орналасқан Ахмет Байтұрсынов атындағы мектептің жоғарғы сынып оқушыларына құқықтық сауаттылықты арттыру және есірткі заттарын тұтынудың зияндығы жөнінде арнайы сабақтар өткізді. Сабақ барысында оқушыларға зиянды әдеттердің қауіптілігі ескертіліп, олардан аулақ болу, салауатты өмір салтын ұстану қажеттілігі туралы түсіндіру жұмыстары жүргізілді.
Айта кетейік, жыл басынан бері қаламыздағы дәріханаларда есірткінің орнын алмастыратын препараттардың дәрігердің рұқсатынсыз сатылымына тосқауыл қою жұмыстары жүргізілуде.
