Мемлекет басшысы Қасым-Жомарт Тоқаев ұлт саулығының кепілі – бұқаралық спортты дамытуға жиі көңіл бөліп келеді. Президент көтерген бастамалардың барлығы да халықтың денсаулығын жақсартып, әл-ауқатын арттыруға мүмкіндік береді.
Бұқаралық спортты дамыту бойынша Түркістан қаласында да бірқатар жұмыстар атқарылуда.
Мәселен, облыс орталығында халықаралық талаптарға сай атшабар мен ескек есу каналының құрылысы жалғасуда.
Көпфункционалды кешен ретінде салынып жатқан атшабар Халықаралық ат спорты федерациясының талабына сай бой көтеруде. Мұнда болашақта халықаралық жарыстарды өткізу көзделген. Атап айтқанда, Олимпиада ойындары бағдарламасына енгізілген конкур, үшсайыс және ұлттық спорт түрлері бойынша жарыстар өткізуге мүмкіндік тумақ.
Бұл нысанда 30-дан аса техника мен 71 адам жұмыс істеуде. Таяуда облыс әкімі нысанның құрылыс жоспарымен танысып, қолданылатын материалдары туралы мамандар пікірін тыңдап, жауапты басшылар мен мердігерге нақты міндеттер жүктеді.
Сондай-ақ Түркістанда халықаралық деңгейдегі ескек есу каналының құрылысы жүріп жатыр.
Бұл кешен елімізде ескек есу, академиялық есу спорт түрлерін, сонымен бірге туризмді дамытуға мүмкіндік береді. Түркістан қаласының суару жүйесіне оң ықпалын тигізеді. Нысанның құрылысы 2021 жылы басталды. Үш кезеңнен тұрады. Бүгінгі таңда үшінші кезеңнің құрылыс жұмыстары қарқынды жүргізілуде. Құрылыс алаңында 165 адам және 24 техника жұмылдырылған.
Кешенде 1000 орындық трибуна, қайықтар мен спорттық жабдықтарды сақтауға арналған эллинг ғимараты, төрешілер мұнаралары, аэрация және сүзу жүйелері, инженерлік инфрақұрылым, сондай-ақ көрермендерге арналған табло, көгалдандыру және абаттандыру элементтері қарастырылған.
Жалпы Түркістанда спорт саласын дамыту бағытында жүйелі жұмыс атқарылуда. Шаөарда спорт нысандарының саны артуда.
Осы орайда түркістанлық спортшылардың өткен айда өте жоғары жетістіктерге қол жеткізгенін айта кеткен жөн. Атап айтсақ, Шри-Ланканың Коломбо қаласында жастар арасында өткен Азия чемпионатында 8 алтын медаль еншіледі. Ал ескек есуден Қытайда өткен Азия чемпионатында 3 алтын медаль жеңіп алды. Сонымен қатар Астана қаласында пара дзюдодан ұйымдастырылған әлем чемпионатында 2 спортшы алтыннан алқа тағынды. Облыс әкімі Нұралхан Көшеров Қазақстанның Әнұранын шарықтатқан осы спортшыларды қабылдап, құрмет көрсетті.
– Сіздер халықаралық деңгейде ел намысын лайықты қорғап, Қазақстанның көк байрағын биікте желбіретіп, Түркістанның абыройын көтердіңіздер. Осы жетістіктеріңіз – Президент тапсырмасының нақты орындалып жатқанынның айқын дәлелі. Мемлекет басшысы Қасым-Жомарт Кемелұлы Тоқаев өз Жолдауында «Спорт – ұлт денсаулығы мен жас ұрпақтың болашағына салынған инвестиция. Біз жас таланттарды қолдауға және спорт инфрақұрылымын дамытуға баса мән беруіміз керек» деп атап өткен болатын. Облыста осы бағытта тиісті жұмыстар жүруде. Жыл сайын жаңа спорт нысандары салынып жатыр. 2024 жылы 73 спорт нысанының құрылысы аяқталып, пайдалануға берілді. 2025 жылы тағы 51 нысанның құрылысын аяқтау жоспарлануда. Біз, облыс басшылығы, спортшыларға және олардың бапкерлеріне барынша қолдау көрсетіп келеміз және бұл бағыттағы жұмыстар жалғасады. Алдағы жарыстарда да жеңісті жолдарыңыз жалғаса берсін. Түркістаннан әлі талай чемпиондар шығады деп сенеміз! – деген Нұралхан Көшеров спортшыларды арнайы марапаттап, қаржылай сыйақы тапсырды.
Кездесуде даңқты бокс бапкері Мырзағали Айтжанов, бокстан Азия чемпионы Шұғыла Нәлібай мен ескек есуден Азия чемпионы Артём Терещенко сөз сөйлеп, спорт саласына қолдау көрсеткен облыс басшылығына ризашылықтарын білдірді. Алдағы байрақты бәсекелерде жеңісті жолды жалғастыруға күш салатындарын жеткізді.
Еске сала кетсек, таяуда Түркістан қаласындағы Бекзат Саттарханов атындағы спорт кешенінде асық ату спортынан 2015-2017 жылы туған ұлдар мен қыздар арасындағы Қазақстан Республикасының чемпионаты өтті. Ел біріншілігіне республиканың 16 өңірінен 100-ге жуық жас спортшы қатысып, өз шеберліктерін ортаға салды.
Жарыстың салтанатты ашылу рәсімінде Түркістан облыстық дене шынықтыру және спорт басқармасының басшысы Ғалымжан Худияров пен асық ату спортынан Қазақстан Республикасының мемлекеттік жаттықтырушысы Жомарт Оразов құттықтау сөз сөйлеп, жас спортшыларға сәттілік тіледі.
Чемпионаттың негізгі мақсаты – ұлттық спортты насихаттап, жасөспірімдер арасында асық ату өнерін дамыту. Бұл – аталған жас санатындағы спортшылардың шеберлігін бағалайтын ең ірі бәсеке. Сонымен қатар әр аймақтағы асық ату спортының даму деңгейін анықтауға мүмкіндік береді.
Айтулы жарыста түркістандық команда жоғары дайындық деңгейін көрсетіп, басты жүлдеден үмітті екендерін дәлелдеді. Айта кетейік, қазіргі таңда асық ату спортын Азия балалары ойындарының бағдарламасына енгізу бағытында нақты жұмыстар қолға алынған. Игі бастама – ұлттық спортты халықаралық деңгейге көтерудің маңызды қадамы болмақ.
