Түркістан қаласында жиһаз өндірісі қарқынды дамып келеді. Қалада жаңа өндіріс орындары ашылып, заманауи технологиялар қолданылуда. Бұл салада жұмыс істейтін кәсіпорындар тұрғындарға және кәсіпкерлік саласына жоғары сапалы, заманауи дизайндағы жиһаз өнімдерін ұсына бастады.
Мемлекет басшысы Қасым‑Жомарт Тоқаевтың “Әділетті Қазақстан: заң мен тәртіп, экономикалық өсім, қоғамдық оптимизм” атты Қазақстан халқына Жолдауында өңдеу өнеркәсібін дамыту — негізгі басымдықтардың бірі екенін атап өткен-ді. Жиһаз өндірісінің дамуы жергілікті экономиканың өсуіне және жаңа жұмыс орындарының ашылуына ықпал етуде. Қала әкімдігінің қолдауымен кәсіпкерлерге жеңілдетілген несие және инвестиция тарту мүмкіндіктері ұсынылуда. Нәтижесінде өндіріс көлемі артып, Түркістан қаласының жиһаз өнімдері республиканың басқа аймақтарына және шетел нарықтарына да шығуда.
Жыл сайын қалада жүздеген мың дана жиһаз өнімдері өндіріліп, ішкі нарықты қамтамасыз етіп қана қоймай, еліміздің өзге өңірлеріне және шетелдік нарықтарға да экспортталуда. Бұл – қала кәсіпкерлерінің тынымсыз еңбегі мен мемлекеттік қолдаудың нақты нәтижесі.
Осы орайда Түркістан қаласының әкімі Әзімбек Пазылбекұлы шаһардағы жиһаз өндірісімен айналысатын ірі кәсіпорындарды аралап, өндіріс барысымен танысты. Қала басшысы «Идеал Туркестан» ЖШС, «LIDER GROUP» ЖК және «ASIA BREND» мекемелеріне арнайы барып, өндірістік үдерісті көзбен көріп, жұмысшылармен және кәсіп иелерімен пікір алмасты.
«Идеал Туркестан» ЖШС – қаладағы ең ірі жиһаз өндірушілердің бірі. Жылына 200 000 дана дайын өнім шығаратын кәсіпорын 3 гектар аумақта орналасқан. Қазіргі таңда 100 адамды тұрақты жұмыспен қамтып отыр. Жылдық қаржылық айналымы – 1,8 млрд теңге. «LIDER GROUP» ЖК – жылына 80 000 дана жиһаз өндіріп, 1,55 млрд теңге көлемінде қаржы айналымын қамтамасыз етіп отыр. 0,55 гектар аумақты алып жатқан кәсіпорында 60-70 азамат еңбек етеді. Компания өнімдерінің басым бөлігі жоғары сұранысқа ие. «ASIA BREND» мекемесі де аймақтағы ірі өндіріс ошақтарының бірі. 1,5 гектар өндірістік аймақта орналасқан кәсіпорын жылына 22 000 дана жиһаз өнімін шығарады. Мұнда 150-ге жуық адам тұрақты түрде еңбек етіп, 1,1 млрд теңге көлемінде қаржылық айналым қалыптастырып отыр.
Аталған кәсіпорындардың барлығы бүгінде толық қуатта жұмыс істеуде. Бұл — Түркістандағы индустриялық дамудың нақты көрсеткіші. Қала әкімі өндіріс орындарының жұмысын жоғары бағалап, өңірлік экономиканы нығайтудағы үлестерін ерекше атап өтті. Сонымен қатар, мемлекеттік бағдарламалар мен жеңілдіктерді тиімді пайдалану арқылы өндіріс ауқымын кеңейтіп, жаңа жұмыс орындарын құрудың маңыздылығын баса айтты.
Өңдеу өнеркәсібін дамыту жөніндегі негізгі міндеттері төмендегідей:
Өңдеу өнеркәсібін жедел дамыту: Еліміздің өнеркәсіптік негізін қалыптастыру және экономикамызды өзімізді толық қамтамасыз ете алатын жағдайға жету мақсатында өңдеу саласын жедел дамытуға баса мән беруіміз қажет. Жоғары деңгейде өңделген өнім шығаратын кластер құру: Экономиканың құрылымына қатысты реформаның негізгі тұстарына тоқтала отырып, жоғары деңгейде өңделген өнім шығаратын кластер құру қажеттігі айтылды. Инвестиция тарту және жаңа технологияларды енгізу: Өндірісті жаңғыртып, жоғары технологиялық өндірістерді құру, инвестиция тарту және жаңа технологияларды енгізу арқылы өңдеу өнеркәсібін дамыту. Отандық өнімнің бәсекеге қабілеттілігін арттыру: Өндірістің заңнамалық базасын жетілдіру, әкімшілік кедергілерді азайту, жеңілдетілген қаржыландыру мүмкіндіктерін қамтамасыз ету, экспортқа бағытталған өнім шығару арқылы отандық өнімнің бәсекеге қабілеттілігін арттыру. Бұл міндеттерді жүзеге асыру арқылы Қазақстанның өңдеу өнеркәсібі қарқынды дамып, ел экономикасының тұрақты өсуіне ықпал ететін болады.
Бүгінгі таңда облыс аумағында жиһаз өндірумен айналысатын ондаған кәсіпорын жұмыс істейді. Олар кеңсе, ас үй, мектеп, қонақүй және тұрғын үйге арналған жиһаздың түрлі үлгілерін жасап шығарады. Жергілікті өнімдер сапасы жағынан шетелдік баламалардан кем түспейді әрі баға тұрғысынан тиімділігімен ерекшеленеді.
Облыс әкімдігінің қолдауымен кәсіпорындар инвестициялық жобалар аясында өндіріс көлемін ұлғайтып, жаңа жұмыс орындарын ашуда. Мысалы, кейбір цехтарда айына 500-1000 дана аралығында жиһаз өнімдері дайындалады. Өнімдердің бір бөлігі облыс ішінде сатылса, енді бірі республика аумағына, тіпті шетелге экспортталуда.
