Қысқа ғана уақытта төрткүл дүниені келісті келбетімен тамсандырып отырған Түркістан қаласының қауіпсіздік көрсеткіші қандай? Рухани астатаның тұрғылықты халық пен туристер үшін тартымдылығы неде?
Қылмыспен күрес шаралары Түркістан қаласында да жоғары деңгейде атқарылып келеді. Мемлекет басшысының Жарлығымен бекітілген он жобаның бірі – «Қауіпсіз ел» ұлттық жобасы. Мұндай жоба Түркістан қаласында да жүзеге асырылып келеді және шаһарда «Қауіпсіз қала» жобасы аясында қолға алынған жұмыстар нәтижесіз емес. Бұл бағытта, әсіресе, түркістандық полиция қызметкерлеріне жүктелген жауапкершілік аса зор. Себебі қауіпсіздік туралы сөз қозғалғанда, ең алдымен, қаланың тыныштығы мен қоғамдық тәртібін қадағалап жүрген тәртіп сақшыларына арқа сүйейтініміз анық.
Қалада қылмыстың азаюына соңғы жылдары жүзеге асырылып келе жатқан «Түркістан – қауіпсіз қала» бағдарламасы да өз септігін тигізуде. Сондай-ақ бүгінде тәртіп сақшылары өз қызметінде киелі қаланы қауіпсіз әрі ішімдіксіз, рухани қала ету бағытына басымдық беруде.
Түркістан қаласы Полиция басқармасының бастығы, полиция полковнигі Бауыржан Жанаевтың айтуынша, ағымдағы жылдың басынан бастап қазіргі таңға дейін, Түркістан қаласы аумағында жалпы 758 қылмыстық құқық бұзушылықтар тіркелген. Түркістан қаласы Полиция басқармасының жеке құрамымен күнделікті қала аумағында жүргізілген профилактикалық жұмыстардың барысында қоғамдық орындарда жасалған қылмыстар 232-ден 231-ге төмендеген.
Сонымен қатар, барлық аса ауыр және ауыр қылмыстар 290-нан 256-ға, оның ішінде, ауыр қылмыстар 274-тен 248-ге, ал аса ауыр қылмыстар 16-дан 8-ге азайған.
Қасақана кісі өлтіру, зорлау қылмысы, қарақшылық қылмысы, тонау қылмысы, ұрлық қылмысы, қорқытып алу қылмысы, отбасы-тұрмыстық қатынас аясында жасалған қылмыстар төмендегенін де атап айтуға болады.
Яғни, күнделікті учаскелік полиция инспекторларымен жүргізілген профилактикалық жұмыстардың барысында ҚР ӘҚБтК-нің 73 бабында (Отбасы-тұрмыстық қатынастар аясындағы құқыққа қарсы әрекеттер) көрсетілген құқық бұзушылықтарды жасаған үшін 402 (2021ж-288) тұлға әкімшілік жауапкершілікке тартылды. Қорғау нұсқамасына 363 (2021ж-301) тұлға, сот арқылы ерекше талап қойылғандар 47 (2021ж-41) тұлға Басқарманың профилактикалық есебіне алынып, олармен бақылау жұмыстары жүргізілуде.
2022 жылдың 9 айында жалпы 62 996 (2021ж-62738) әкімшілік хаттама толтырылған. Оның ішінде қоғамдық саласы (нөлдік төзімділік) бойынша 12 168 (2021ж-12390) әкімшілік хаттама толтырылыпты.
Жол қозғалыс ережелері бойынша жалпы 50 828 (2021ж-50348) құқық бұзушылықтар анықталып, яғни +0,9 пайызға жоғары болып отыр.
«Салынған айыппұлдар сомасы 449 527 110 (2021ж-449 127 527) теңге салынса, оның 270 477 088 (2021ж-269 003 048) теңгесі өндіріліп, яғни өндірілу пайызы 60,1 пайызды құрап отыр»,-дейді полиция полковнигі Бауыржан Жанаев.
Қоғамымыздағы өзекті мәселелердің бірі – кәмелеттік жасқа толмаған жасөспірімдер арасындағы қылмыстық оқиғалар. Елдің болашағы бүгінгі жастар екенін ескерсек, балалар арасындағы қылмыстың көбеюі мемлекетіміз үшін, ұлтымыз үшін өте алаңдатарлық жағдай. Бұл қауіпті кеселмен қала полициясы қалай күресіп келеді?
Мамандардың айтуынша, қалада жасөспірімдермен жасалған қылмыстар едәуір төмендеген.
Ағымдағы жылдың басынан бастап жасөспірімдермен жасалатын қылмыстарды алдын алу мақсатында, прокуратура, қалалық әкімшілік, білім бөлімімен бірлесіп, «Балалардың жол қауіпсіздігі», «Жасөспірім», «Абайлаңыз балалар», «Түнгі қаладағы балалар» атты рейдтік іс-шаралары өткізілген. Сондай-ақ түнгі рейдтік іс-шаралар күнделікті жүргізілуде.
Нәтижесінде, 935 әкімшілік құқық бұзушылық жасаған жасөспірімдер анықталып, олардың ата-аналарына әкімшілік шаралар көрілген.
Ювеналды полиция тобының кызметкерлерімен 2022 жылдың 09 айында Полиция басқармасына 995 жасөспірім жеткізіліп, олардың ішінде 135 жасөспірім, 60 жайсыз отбасы Басқарманың профилактикалық есебіне алынып, олармен күнделікті профилактикалық жұмыстар аткарылуда.
«Дегенмен, біршама кемшіліктермен жұмыс жасауымызға тура келіп тұр» дейді Бауыржан Даулетханұлы. «Атап айтқанда, денсаулыққа қасақана ауыр зиян келтіру, бұзақылық қылмысы, масаң күйде жасалған қылмыстары өсіп отыр. Себебі, қылмыстардың көп бөлігі масаң күйде жасалғандықтан, оның алдын-алу мақсатында қала аумағында орналасқан сауда орындарда алкоголь өнімін белгіленбеген уақытта сатқандары үшін 56 тұлға Қазақстан Республикасының Әкімшілік құқық бұзушылық туралы Кодексінің 200 бабында (Қазақстан Республикасы заңнамасының алкоголь өнімін өткізу жөніндегі талаптарын бұзу) көрсетілген талаптарды бүзағандары үшін әкімшілік жауапкершілікке тартылған. Соның салдарынан, қазіргі таңда көптеген сауда орындары заңмен белгіленген тәртіпте алкоголь өнідмерін өткізуде, яғни сағат 23:00-ден келесі күнгі 08-00 дейінгі аралықта, ал этил спиртінің көлемді үлесі отыз пайыздан асатындарын сағат 21-ден келесі күнгі сағат 12-ге дейін бөлшек сауда арқылы өткізу тәртібі орнатылуда. Ол дегеніміз мас халде жасалған қылмыстардың масаң күйде және түнгі уақытта спирттік ішімдіктерге қол жетімділігін қысқарта алдық. Ал, ҚР ӘҚБтК-нің 440-бабымен (Алкогольдік ішімдіктерді ішу немесе қоғамдық орындарға масаң күйде келу) жалпы 1145 (2021ж-1120) құқық бұзушылықтар анықталып, әкімшілік хаттама толтырылды. Бұл бағытта профилактикалық жүмыстар жалғасуда»,- дейді ол.
