Бүгін облысымыздың бір топ зиялы қауым өкілдері Түркістан облысына арнайы жұмыс сапарымен келген «AMANAT» партиясының Атқарушы хатшысы Асхат Ораловпен кездесті. Хатшы партияның жаңару, жандану аясында атқарылып жатқан жұмыстарды баяндап, еркін форматта пікір алмасты.
Келелі жиынға Түркістан облысы әкімінің орынбасары Сәкен Қалқаманов, «Amanat» партиясы Түркістан облыстық филиалының атқарушы хатшысы Бейсен Тәжібаев қатысты.
Алғашқылардың бірі болып сөз алған елімізге белгілі сазгер, профессор, ұстаз Бекжігіт Сердәлі партияның жұмысына сәттілік тілеп, бірқатар өзекті мәселелерді оның ішінде талантты жастарды қолдау, оларды қоғамдық жұмыстарға белсене қатыстыру, ән, күй сапасын жақсарту мақсатында шығармашылық кеңес құру сынды ұсыныстарын жеткізді.
«Ұлы дала елі» орталығының директоры Гүлжанат Дүйсенбаева рухани астанамыздағы мәдени ошақтардың жұмысын баяндап, мемлекет және қоғам қайраткері Нәзір Төреқұловтың Түркістан қаласынан арнайы мұражайын ашу қажеттігін көтерді.
Қазақтың ақтангері атанған айтыскер ақын Бекарыс Шойбеков партияның аймақтық филиалдарының жұмысын оңтайландыру, қызметкерлердің жалақысын көтеру, қоғамдық қабылдау бөлімшелерінде заңгер-кеңесші мамандардың қатарын арттыру сынды ұсыныстарын тілге тиек етті.
«Сақ» киностудиясының президенті, елімізге танымал аниматор Нұриддин Пәттеев бала тәрбиесіне ықпал ететін тарихи, қазақы мултипикациялық және көркем фильмдерді көптеп түсіру, осы салада еңбек етіп жатқан мекемелерге мемлекет тарапынан қолдау, демеу қажеттігін көтерді.
Жалпы, кездесуде баспанамен қамту, жастарға қолдау көрсету, туризмді дамыту сынды кең ауқымды мәселелер талқыға салынды.
Жиынды қорытқан атқарушы хатшы тілге тиек етілген мәселелелерді назарда ұстап, келешекте шешілуіне ықпал етуге, ұсыныстарды тіпті жазбаша түрде де қабылдауға әзір екенін айтты.
А. Оралов Түркістанда аймақтағы партия активімен де кездесті. Жиынға Түркістан облысының әкімі Өмірзақ Шөкеев қатысты. Басқосуда Мемлекет басшысының Қазақстан халқына Жолдауында жариялаған реформаларын сапалы жүзеге асыру жайы талқыланды.
– «AMANAT» Жолдауда айтылған негізгі міндеттерді орындауда басты қозғаушы күш болуы тиіс. Бұл үшін 800 мыңға жуық партиялас, оның ішінде Түркістан облысындағы 80 мың партиялас жұдырықтай жұмылып, ортақ мақсат, бір мүдде жолында жұмыс істеуіміз керек. Өздеріңіз білетіндей, Президент тапсырмасына сәйкес, 14 наурыздан бастап мобильді қоғамдық қабылдаулар іске қосылды. Алдағы үш айда мобильді қабылдаулар Қазақстанның барлық өңірлерін аралап, шалғай ауылдарға ерекше көңіл бөледі. 11 сәуірде олар Түркістан өңіріне де ат басын тірейді. Осы орайда, мобильді қоғамық қабылдау жұмысына мәслихат депутаттарын, өңірлік филиалдардан Бюро мен Саяси кеңес мүшелерін, қоғамдық кеңестер мен мемлекеттік органдардың өкілдерінің қатысуын қамтамасыз ету қажет. Өткен сайлауда халыққа берген уәделеріміздің орындалуын қадағалау өте маңызды. Өңірде филиал басшылығы назар аударатын мәселелер де жеткілікті. Халық тығыз шоғырланған өлке болғандықтан, бұл аймақта әлеуметтік-экономикалық мәселелер өзекті. Сондықтан ең әуелі халықпен тығыз қарым-қатынаста жұмыс істеп, азаматтардың мұң-мұқтажына құлақ асу керек. Бұл партия атынан сайланған мәслихат депутаттары мен ауыл әкімдеріне тікелей қатысты, – деді А. Оралов.
Сонымен қатар, атқарушы хатшы Түркістан облысында жаңадан құрылған Сауран ауданының орталығы Шорнақ ауылында жаңа сайланған ауыл әкімдерімен және тұрғындармен кездесті.
– Мемлекет басшысы Қасым-Жомарт Тоқаевтың бастамасымен былтыр тұңғыш рет ауыл әкімдерін тікелей сайлау жүйесі енгізілген болатын. Бүгінде сайлау науқаны еліміз бойынша үздіксіз үдеріске айналды. Осыған дейін Түркістан облысында 72 ауылдық округте сайлау өтті. Соның 62-сі немесе 86%-ы «AMANAT» партиясының мүшесі. Сайланған әкімдермен ауылдың ортақ проблемаларын шешу жолдарын талқыладық.
Әкімдердің алдында қазір үлкен жауапкершілік пен халықтың үміт-сенімі тұрғаны анық. Сондықтан «AMANAT»-тың атынан сайланған әкімдерді, депутаттарды халықпен тығыз қарым-қатынаста жұмыс істеп, партияның абырой-беделін арттыру үшін аянбай қызмет етуге шақырамын, – деді ол.
Кездесу барысында Шорнақ ауылының тұрғындары осындағы Б.Майлин және К.Досметов көшелеріндегі жолдың сапасына шағымданды. Жергілікті әкімдіктің мәліметінше, аталған көшелерді жөндеуге бюджеттен қаражат бөлу ұсынылған. А. Оралов өз кезегінде енді келесі сессияда елдің талап-тілегіне барынша көңіл бөліп, қажетті қаражат бөлуді айтты. Тұрғындардың шағымын ескеріп, бұл жұмыстарды жеделдетуді тапсырды. Көшелерді жөндеу жұмыстары ағымдағы жылы жүргізілетін болады.
