Қазақстанның халық ақыны Мұхтар Шахановтың 80 жылдық мерейтойына арналған іс-шара ақынның туып, өскен жері Шілік ауылындағы шығармашылық үйінде жалғасын тапты. «Тарихыңды таны – тұлғаңды құрметте» атты аудан жастарының ақынмен еркін форматта өткізген кездесу жиынына аудандағы әдебиетке, өнерге өз үлесін қосып жүрген шығармашыл жастар мен зиялы қауым өкілдері қатысты.
Басқосуда алғаш сөз алған аудан әкімі Сәкен Сұлтанханов ақынды мерейтойымен құттықтап, ізгі тілегін арнады.
Аудан басшысы өз сөзінде: «Әрбір өлкенің халқына суықта пана, ыстықта сая болған, есімдері ел есінде сақталған біртуар перзенттері бар. Осындай перзенттеріміздің бірі Мұхтар Шаханов. Осының бәрін жас ұрпақ жете танып, біліп өсуге тиіс»-деп атап өтті.
Кездесу барысында сенатор Әлімжан Құртаев өз ойларын ортаға салып, өнерді, ақынды құрметтеген жастардан келешекте үлкен үміт күтуге болатынын тілге тиек етті.
Шындықты ту ететін, тек биік шыңдарды бағындыратын ақын туындылары өміршең келеді. Ақындық пен азаматтықты тең ұстайтын, елдің сөзін сөйлеп, жоғын жоқтайтын ақынның жас ұрпаққа қалдырар сөзі мен рухани танымы терең өміршең өлеңдері екені даусыз. Кездесуде ақын өлеңдерін сүйіп оқитын жастар М.Шахановтың туындыларын жатқа оқып берді. Жастардың жігерлі, өршіл, рухты қалыппен өсіп келе жатқанына ерекше қуанған ақын «бұдан асқан бақыт, бұдан асқан қуаныш жоқ шығар» деген ойын үлкен тебіреніспен жеткізді.
Басқосуда жастар ақынмен пікір алмасып, ұлт мүддесі, ұлттық рух, салт-дәстүр, тарихи таным мен ұлттық құндылықтар туралы кеңінен әңгіме өрбітті.
