Түркістан облысы, Қазығұрт ауданында жастардың шығармашылық әлеуетін дамытуға бағытталған жайдарман ойыны жоғары деңгейде ұйымдастырылды. Аталған шара өңірдегі мәдени-рухани өмірдің ажырамас бөлігіне айналып, өнер мен әзілді ұштастырған мазмұнды кеш ретінде көпшіліктің көңілінен шықты. Қазығұрт аудандық прокуратурасының, аудандық білім бөлімінің және жастар ресурстық орталығының бірлесіп ұйымдастыруымен «Заң мен Тәртіп» қағидаты аясында «Жастар – әлемді өзгертетін күш» атты жайдарман ойыны жоғары деңгейде өтті.
Аталған шараның мақсаты – жастардың шығармашылық қабілеттерін дамыту, олардың бойындағы тапқырлық пен сахналық мәдениетті қалыптастыру, өзара достық қарым-қатынасты нығайту және бос уақыттарын тиімді ұйымдастыру. Сонымен қатар жастарды құқықтық мәдениетке баулу, қоғамдағы белсенділігін арттыру да басты назарда болды.
Көңілді әрі тартысты өткен сайысқа ауданның білім беру ұйымдарынан құралған 9 команда қатысып, өзара бақ сынады. Қатысушылар «Сәлемдесу», «Сұрақ-жауап» және «Бес жаңалық» кезеңдері бойынша өнер көрсетіп, көрермендерге көтеріңкі көңіл күй сыйлады. Әр команда өздерінің әзілдерімен, сахналық қойылымдарымен ерекшеленіп, тапқырлық пен креативтіліктің үлгісін көрсетті.
Сайыс қорытындысы бойынша І орынды «Дарын жастары» командасы (Дарын мектеп-интернаты) жеңіп алды. ІІ орын «Bulaq boys» командасына (Ащыбұлақ ЖББМ) бұйырса, ал ІІІ орынды «Алғыр жетілік» командасы (Т.Рысқұлов ЖББМ) қанағат тұтты.
Сондай-ақ арнайы номинациялар бойынша «Үздік ойыншы» аталымын Бақтияр Нұрасыл («Шаңырақ» командасы, Қ.Сәтпаев мектеп-лицейі) иеленді. «Үздік әзіл» номинациясы №11 санаториялық мектеп-интернатына табысталып, 100 000 теңге сертификат табысталды.
Жеңімпаздар мен жүлдегерлер арнайы дипломдармен, бағалы сыйлықтармен және кубоктармен марапатталды.
Айта кетейік, мұндай мазмұнды әрі тәрбиелік мәні зор іс-шаралар жастардың жан-жақты дамуына, олардың қоғамдағы белсенді азамат ретінде қалыптасуына оң ықпал етеді.
Жайдарман — тек көңіл көтеру алаңы ғана емес, ол жастардың ой ұшқырлығын, тапқырлығын және сахна мәдениетін шыңдайтын маңызды мәдени жоба. Қазығұрттағы бұл додаға ауданның белсенді жастары қатысып, өзара бақ сынады. Қатысушылар түрлі тақырыптағы әзіл-қалжыңдарын ұсынып, қоғамдағы өзекті мәселелерді астарлы түрде жеткізе білді. Әсіресе ұлттық құндылықтар, туған жерге деген сүйіспеншілік, достық пен бірлік тақырыптары көрініс тапқан қойылымдар көрерменнің ыстық ықыласына бөленді.
Іс-шара барысында командалар «Сәлемдесу», «Үй тапсырмасы» және «Қайым айтыс» кезеңдері бойынша өнер көрсетіп, әр бөлімде өздерінің креативтілігі мен сахналық шеберліктерін паш етті. Әзілдерінде заманауи трендтер мен жастар өміріндегі түрлі жағдайлар шынайы әрі әсерлі бейнеленді. Көрермендер залында ерекше атмосфера қалыптасып, қатысушыларға қызу қолдау көрсетілді.
Бұл шара Түркістан облысында мәдениет пен өнерді дамытуға бағытталған жүйелі жұмыстардың бір көрінісі. Өңірде соңғы жылдары жастардың бос уақытын тиімді ұйымдастыру, олардың шығармашылық бастамаларын қолдау мақсатында түрлі мәдени жобалар тұрақты түрде өткізіліп келеді. Соның ішінде жайдарман қозғалысы ерекше орын алады. Ол жастардың сахнаға деген қызығушылығын арттырып қана қоймай, олардың өз ойын еркін жеткізуіне, қоғамға белсенді араласуына жол ашады.
Сонымен қатар, мұндай мәдени шаралар өңірдегі рухани жаңғыру үдерісін ілгерілетіп, ұлттық өнердің дамуына серпін береді. Жастардың өнерге деген қызығушылығын арттыру арқылы олардың бойында эстетикалық талғам қалыптасып, мәдени құндылықтарға деген құрмет нығая түседі.
Қазығұртта өткен жайдарман ойыны – облыстағы мәдени өмірдің жанданып келе жатқанын көрсететін жарқын мысал. Алдағы уақытта да осындай игі бастамалар жалғасын тауып, өңір жастарының өнердегі жетістіктері арта беретініне сенім мол.
