Бүгін Бәйдібек ауданының әкімі Ержігіт Шәріпбеков алтын құрсақты аналарымызды қабылдап, мемлекет басшысы Қасым-Жомарт Кемелұлы Тоқаевтың Жарлығына сәйкес, «Алтын алқа» және «Күміс алқа» төсбелгілерін табыс етті. Еліміздің халық санын арттырып, ел демографиясына үлес қосып отырған аудандағы ақ жаулықты 29 ана осы марапатқа ие болып отыр.
Салтанатты марапаттау рәсімінде Ержігіт Шәріпбекұлы көпбалалы аналарды құттықтау барысында өзінің де көпбалалы отбасында тәрбиеленгенін айтып өтті. Алтын құрсақты аналарға әрқашан құрметтің жоғалмайтынын, сонымен қатар еліміздегі ана мен баланы қорғауда мемлекет тарапынан түрлі қамқорлықтар жасалынып жатқанына тоқталды.
Қазақстан Республикасының Президенті Қасым-Жомарт Кемелұлы Тоқаевтың 2022 жылы 25 мамырдағы №902 Жарлығына сәйкес Борлысай ауылдық округіне қарасты Қошқарата ауылынан Ләззат Дулатбаева, Қаратас ауылынан Жанар Ибраева мен Сәрсекүл Шәріпқызы, Амансай ауылынан Сандуғаш Нұрманбаева, Жамбыл ауылынан Мөлдір Утегенова «Алтын» алқаға ие болды. Сонымен бірге осы Жарлыққа сәйкес 24 ана «Күміс» алқамен марапатталды.
Аудан әкімі Ержігіт Шәріпбеков батыр аналарға деген өзінің тілегін айтып, сый-сияпатын жасады. Жиын соңында аяулы аналармен естелік суретке түсті.
