Түркістан облысы, Бәйдібек ауданы, Ағыбет елді мекенінде 1993 жылы туған ауыл жастарының демеушілігімен салынған кіші футбол алаңшасы пайдалануға берілді. Футбол алаңшасының ашылуына аудан әкімінің орынбасары Берік Тұрлыбеков қатысып, отаншыл азаматтардың бастамасына ризашылығын білдірді.
Шарада округтің төбе биі Әлмырза Еркебаев, Ағыбет ауылының биі Сейдалы Әмірбеков аудандық мәслихаттың депутаты Әбдірахман Төрехан, құттықтау сөз сөйлеп, ауыл тұрғындарының қуанышымен бөлісті. Жаңа алаңда ауыл жастары арасында футболдан жарыс ұйымдастырылды.
Бүгінде Бәйдібек ауданында оң өзгерістер мол. Түрлі нысандар салынып, жобалар жүзеге асып жатыр. Ең үлкен мәселе су еді, қазір скважиналар қазылуда. Су қоры анықталды. Бұл істі соңына дейін жеткізу көзделуде. Бұрын Бәйдібекте газ жоқ еді, қазір қамту көрсеткіші еселеп артып жатыр. Мәселен, сәуір айында Ынтымақ елді мекенін газға қосу іс-шарасы өтті. Жалпы ауданда газбен қамту жұмысы қарқынды. 2022 жылдың сәуір айында 1 аптаның ішіне 8 ауылға газ берілді. Мыңбұлақ ауылдық округі «көгілдір отынмен» 100 пайыз қамтылды.
Айта кетейік, 2021 жылы ауданда жалпы өңірлік өнім көлемі 47.1 млрд. теңгеге жетіп, өткен жылмен салыстырғанда 2,9 млрд. теңгеге артып отыр. Өнеркәсіп өнімінің көлемі 1,3 млрд. теңгені құраса, инвестиция көлемі 14,5 млрд. теңгені құрап, 1,3 есеге артқан. Ауыл шаруашылығы өнімінің көлемі 28 млрд. теңгеден асып отыр.
Сондай-ақ биыл тамыз айында Бәйдібек ауданында жаңа кітапхана пайдалануға беріледі. Шаяндағы 100 мың кітап қорына арналған орталық кітапхананың құрылысы былтыр басталған. Орталық кітапхана бүгінде аудандық мәдениет үйінің ғимаратына уақытша орналастырылған.
Жалпы аудан аумағында 25 кітапхана жұмыс істейді. Оның 23-і ауылдық, 1-і аудандық орталық кітапхана болса, 1-і балалар кітапханасы. Онда – 221 849 дана кітап қоры бар.
