Отырар аудандық жастар ресурстық орталығының ұйымдастыруымен жас отбасылар арасындағы «Бақытты жас отбасы» отбасылық спорттық сайысы өтті. Мұндағы басты мақсат – отбасы құндылықтарын қалыптастырып қана қоймай, ұжымдық байланысты арттырып, салауатты өмір салтын қалыптастыру болды.
Шарада аудан әкімі Сәкен Сұлтанханов бала өмірінде салауатты өмір салтын қалыптастыруда әке мен ананың рөлі орасан зор екенін айтып, сайысқа қатысушыларға сәттілік тіледі.
Аудан басшысы өз сөзінде: «Халқымыздың тамыры терең тарихымен бірге жалғасып келе жатқан рухани байлықтарының бірі отбасы құндылықтары. Тіпті біздің рухани құндылықтарымыздың негізі де осы отбасылық дәстүрімізде жатыр десек қателеспеген болар едік. Тәлімді тәрбие отбасыдан бастау алса, дені сау ұрпақ ұлт болашағы болмақ. Сондықтан қоғамдағы әрбір жас отбасы ел болашағы отбасыда қалыптасатынын терең ұғынуы керек. Ендеше бүгінгі шараға қатысып жатқан жас отбасы мүшелеріне сәттілік тілеймін», – деді.
Отбасылық жарысқа аудандағы әр ауыл округтерінен келген «Аламан», «Сұңқар», «Қыран», «Бірлік», «Барыс», «Бүркіт», «Жүйрік», «Сұңқар-2» атты сегіз команда қатысып, бақтарын сынады. Бірлігі мен ынтымағы жарасқан командалар «Біздің жанұя», «Жүйрік болсаң шауып көр», «Капитандар сайысы» атты кезеңдер бойынша сынға түсті. Тартысты сайыста ардагер ұстаз Пердехан Жаппарқұлов, спорт саласының ардагері Талғат Рахметов, Жамбыл атындағы мектеп-лицейінің дене шынықтыру пәнінің мұғалімі Кенжегелді Маханбетовтер қазылық етіп, әділ бағаларын берді.
Отбасылық сайыс соңында жеңімпаз командалар марапатталып, жүлдегерлерге арнайы сыйлықтар табысталды.
