Жуырда Түркістан облыстық дін істері басқармасының басшысы Р.Сабыржанұлы Мақтаарал, Жетісай, Келес, Сарыағаш және Сайрам аудандарына арнайы барып, аудандардың діни ахуалымен танысты.
Сондай-ақ дін саласы бойынша жұмыс жүргізетін жергілікті ақпараттық-түсіндіру топ мүшелері, діни бірлестік қызметкерлері және дін саласына жауапты мамандармен кездесулер өткізді.
Кездесулер барысында діни тұрақтылықты қамтамасыз етудегі мемлекеттің саясаты мен зайырлылық қағидаттары бойынша тиісті нұсқаулықтар беріліп, өзекті мәселелер бойынша ұсыныс-пікірлер тыңдалды.
Бүгінгі таңда Қазақстан мұсылмандары діни басқармасы отандық туризмді дамытуға үлес қосу мақсатында «Darhan Dala» жобасын іске қосты. Бірнеше бағыт бойынша жұмыс істейтін жаңа жоба шетелдегі және еліміздегі киелі орындарға зиярат, денсаулық, экотуризм бағыты бойынша тур ұйымдастырады.
Аталған жоба Түркістан өңірінде жүзеге асуда. Бұл ретте имамдардың жетекшілігімен киелі орындарға арнайы турлар ұйымдастырылып, сапар барысында зиярат жасау мәдениеті мен әдебі түсіндіріліп, тиісті насихат жұмыстары жүргізілмек. Бұл ретте Түркістан қаласының туристік әлеуеті үлкен мүмкіндікке ие.
Әлемдік мұсылман қауымы арасында беделді Ислам ғұламаларының зиратына зиярат ету, қасиетті жерлерге зиярат жасау мәдениеті қалыптасып, мұсылман елдерінде зиярат туризм саласы жақсы дамығаны белгілі. Ыстамбұл-Түркістан бағыты бойынша әуе рейсі ашылғаны белгілі. Түркістан-Джидда әуе рейсін ашу туралы бастама Орта Азия елдері азаматтарын киелі Түркістан арқылы қажылық немесе ұмра сапарына жіберуге үлкен мүмкіндік туғызады.
Облыста 6 діни конфессияға енетін 30 жергілікті діни бірлестік пен 754 филиал жұмыс істейді. 752 мешіт бар. Еліміздегі әрбір үшінші мешіт Түркістан облысында орналасқан.
