Түркістан облысы қоғамдық даму басқармасының басшысы Аңсар Өсербаевтың төрағалығымен жиын өтті.
Жиында басқармаға қарасты «Қоғамдық келісім» КММ-і филиалдарының жыл басынан бері атқарылған жұмыстары мен алдағы жоспарлары талқыланды.
Бұл ретте басқарма басшысына «Қоғамдық келісім» КММ-нің аудан, қалалардағы филиал басшылары жыл бойы атқарылған жұмыстар бойынша есеп берді.
Аңсар Жаңабайұлы өз сөзінде Мемлекет басшысының «Халық үніне құлақ асатын мемлекет» тұжырымдамасын негізге алып, этносаралық бірлікті сақтау, тұрғындармен тығыз байланыс орнатып, елді игі істерге ұйыстыру қажет екенін жеткізді.
– Құндылықтың қастерлісі – елдің тыныштығы, береке-бірлігі. Бұл ретте, этносаралық шиеленістердің алдын алуда түсіндірме жұмыстарының маңызы зор. Қазіргі таңда ақпараттық-насихаттық жұмыстарға тарту мақсатында жергілікті жерлердегі беделді азаматтардың тізімі жасақталған. Президент әкімшілігінің тапсырмасына сәйкес, ауыл интеллигенциясына басымдық берілуде. Бұл өз кезегінде қоғамдық келісімді сақтауда маңызды рөл атқарады. Осы орайда, сіздер өңіріміздің аудан, қалаларында ақпараттық түсіндіру жұмыстарын жандандыруларыңыз қажет. Ел ішіне іріткі салатын фейк жаңалықтармен дер кезінде күресіп, этностарды ұйыстыруға сеп болуға бірлесе күш жұмылдыру керек, – деді басқарма басшысы.
Жалпы, қоғамдық даму басқармасы «Қоғамдық келісім» КММ-нің және филиалдарының тарапынан жыл басынан бері өңіріміздің аудан, қалаларында 90-нан аса ақпарататтық-насихаттық топтың кездесуі өткізілген.
Бүгінде қайта түлеп, түрленіп келе жатқан Түркістан облысының халқы 2 миллионнан асады. Облыс тұрғындарының 23 пайызын этнос өкілдері құрайды. Өңірде 50-ден аса этностың өкілдері береке-бірлікте өмір сүріп келеді.
Түркістан облыстық Қазақстан халқы Ассамблеясының жұмысын ғылыми-сараптамалық, ақпараттық-насихаттық, талдамалық сүйемелдеуді ұйымдастыру, этномәдени бірлестіктер мен Қазақстан халқы Ассамблеясы құрылымдарының қызметін үйлестіру «Қоғамдық келісім» коммуналдық мемлекеттік мекемесі қызметінің негізгі бағыттары болып саналады. Облыстық Ассамблея құрамында облыстық, аудандық деңгейдегі 31 этномәдени бірлестік пен Ассамблея жанындағы құрылымдар – «Қоғамдық келісім кеңесі», «Аналар кеңесі», «Ғылыми-сарапшылық топ», «Медиация» кабинеті, «Журналистер мен блогерлер клубы» және «Ассамблея жастары» Республикалық Қоғамдық Бірлестігі облыстық өкілдігі ел бірлігін нығайту жолында жемісті жұмыс істеп жатыр.
Этносаралық шиеленістердің алдын алуда түсіндірме жұмыстарының маңызы үлкен. Бұл ретте, өңірде 2020 жылы облыс көлеміндегі этносаралық ахуалды зерттеу жұмыстарын оңтайландыру мақсатында облыстың этнокартасы жасақталған болатын. Картадағы мәліметтер жылына екі рет тура сол кездегі жағдай бойынша жаңартылып, тиісті мәліметтер енгізіліп отырады. Тұрғындар арасында қоғамдық келісім мен бірлікті насихаттау, этносаралық кикілжіңдер мен құқық бұзушылықтардың алдын алу мақсатында облыстық Қазақстан халқы Ассамблеясының мүшелері, құқық қорғау және салаға жауапты органдарының басшылары, аудан, қала әкімдіктерінің қызметкерлері және жергілікті жерлердегі беделді азаматтар, жастар өкілдері енгізіле отырып, ақпараттық-насихаттық топтар құрылған. Бұл топтар облыстағы этнос өкілдері тығыз шоғырланған аудандарда этносаралық татулық пен ынтымақтастықты, достық қарым-қатынасты сақтау, этносаралық толеранттылықты нығайту мақсатында былтыр 116 ақпараттық-түсіндіру жұмыстарын жүргізді. Ақпараттық-насихаттық жұмыстарға тарту мақсатында жергілікті жерлердегі беделді азаматтардың тізімі жасақталған. Түркістан облыстық Қазақстан халқы Ассамблеясы хатшылығы мен «Қоғамдық келісім» КММ-нің қызметкерлері облыстық және жергілікті атқарушы органдармен бірлесе отырып, тұрақты түрде этникалық топтар жинақы тұратын аудандардағы этнос өкілдері арасындағы туындауы мүмкін шиеленістерді анықтау бойынша жұмыстар жүргізеді.
Өткен жылы этнос өкілдері тығыз шоғырланған 38 елді мекен тұрғындары арасында сауалнамалар жүргізу және фокус-топтық кездесулер өткізу арқылы халықтың көңіл күйі мен мемлекеттік этносаясатқа көзқарасын анықтау мақсатында мониторинг жұмыстары жүргізілді. Бұл бағытта түрлі тақырыптарда семинарлар өткізіліп келеді. Сол іс-шаралардың барысында Нұр-Сұлтан қаласындағы «Қолданбалы этносаяси зерттеулер институтының» және этносаралық қатынастарды зерттеуші ғалымдардың методикалық кеңестері тыңдалды. Сонымен қатар, таяуда елімізге белгілі тарихшы-ғалым Жамбыл Артықбаевтың «Қазақстан: этникалық қарым-қатынастар тарихы, этносаралық қарама-қайшылықтар және этномәдени ықпалдастық мәселелері» және «Этносаралық шиеленістердің шығу себептері мен алдын алу шаралары» тақырыбында әдістемелік нұсқаулықтары, бұдан бөлек «Түркістан облысы Қазақстан халқы Ассамблеясы» анықтамалық сөздігі жарыққа шықты. Бұл құнды кітапшалар мамандардың жұмысына үлкен көмегін тигізуде.
Биыл ақпан айының 1-17 күндері аралығында Түркістан облыстық ҚХА жанындағы ақпараттық-насихаттық топтың қатысуымен 13 аудан, қала тұрғындарымен «Агроөнеркәсіптік секторда прогрессивті технологияларды ілгерілету», «Бүгінгі келісім – мәңгілік бейбітшілік» және әскери міндет саласындағы заңнамаларды орындау қажеттілігі тақырыптарында кездесулер өтті. Облыс бойынша биыл тұрғындармен 56 кездесу өткізілді. Сондай-ақ, 2022 жылғы 30, 31 наурыз және 1 сәуір күндері ҚР Ақпарат және қоғамдық даму министрлігі мен құқық қорғау органдары бірлесе отырып, облыстағы жергілікті атқарушы, құқық қорғау органдары және білім саласының мамандарына арнап «Дағдарыстық және қақтығыстық жағдайларға әрекет ету алгоритмі» тақырыбындағы үш күндік семинар-тренинг ұйымдастырылды. Өңіріміздегі түрлі этностар бір шаңырақтың астында қиын жағдайда бір-біріне көмектесіп, достық қарым-қатынаста өмір сүруде. Облыстық «Қоғамдық келісім» мекемесінің қызметкерлерімен облыс аумағында жергілікті тұрғындар мен этнос өкілдерінің арасындағы этносаралық ахуалды саралау мақсатында облыс тұрғындары арасында социологиялық сауалнама, фокус топтық зерттеу жұмыстары жүргізілуде.
Басқосуда салалар бойынша туындап отырған өзекті мәселелер ортаға салынып, олардың шешу жолдары ұсынылды.
Жиынды қорытындылаған басқарма басшысы салалық бөлім мен филиал басшыларына нақты тапсырмалар беріп, ел бірлігін нығайту жолында бірлесе жұмыс істеуге шақырды.
