Бүгін Төлеби ауданына арнайы іссапармен Қазақстан Республикасының Мәдениет және спорт министрі Дәурен Әскербекұлы Абаев келді.
Мәдениет саласына жауапты министр былтырғы жылы Ел Тәуелсіздігінің 30 жылдық мерекесі аясында Аққұм ауылында ашылған «Суретшілер үйінің» жұмысымен танысты.
Туған жерінен шабыт алып, шығармашылығын шыңдаған қылқалам шеберлерінің көрмесін тамашалап, жас таланттардың туындысына көңіл бөлді. Өнер мекенінің ашылуына тұма өнерді тұла бойына сіңірген жерлесіміз, Қазақстан Суретшілер Одағының мүшесі Құттыбек Жақыповқа жолықты.
Суретшілер үйін аралап, қазақ ұлттық гобелен өнерінің негізін қалаушы, Мемлекеттік сыйлықтың иегері Құрасбек Тыныбековтің туындыларымен танысты.
Суретші, қазақ тоқыма өнерін кәсіби тұрғыда қайта түлетуші, біртума талант Құрасбек Тыныбековтың шығармалары, әр туындыдағы айтар ойы жөнінде бауыры Құттыбек Тыныбекұлы әңгімеледі.
Ұлтына, еліне деген сүйіспеншілігін өнерімен паш еткен қылқалам шеберінің есімі еліміздің ұлттық қолданбалы өнері тарихында әрқашан көшбастаушы ретінде жарқырай береді.
Дәурен Әскербекұлы іс-сапар барысында қылқалам шеберлерімен кездесіп, жас таланттарға шығармашылық шабыт тіледі.
Төле би ауданы – нағыз таланттардың мекені. Мұнда халықаралық деңгейде танылған суретшілердің де қатары көп. Былтыр таланттар мекенінде ел Тәуелсіздігінің 30 жылдық мерекесі аясында Аққұм ауылында «Суретшілер үйі» ашылған болатын. Өнер орталығының ашылуына осы өлкенің тумасы, Қазақстан Суретшілер Одағының мүшесі Құттыбек Жақыпов мұрындық болды.
Мәдениет үйінде еліміздің өңірлерінен және шетелдерден келген өнер иелеріне Құттыбек Тыныбекұлының туындылары таныстырылып, өнер иесінің “Төлеби – Ұлы Дала мекенім” атты шығармашылық кеші өткен еді. Ұлтымыздың тарихын, салт-дәстүр, әдет-ғұрып, тұрмыс тіршілігін бейнелі әрі көркем түсіндіретін халықаралық деңгейде ұйымдастырылып жатқан «Төлеби – Ұлы Дала мекенім» атты суретшілер плэнеріне көршілес Өзбекстан, Қырғызстан мемлекеті мен Нұр-Сұлтан, Алматы қалаларынан халықаралық дәрежедегі сурет шеберлері келді. Жас суретшілердің шығармашылығына серпін беретін облыстық «Бір өлке – бір сурет!» атты жас суретшілер симпозиумының плэнермен бірге өтуінің өзі бұл шараның халықаралық деңгейде дәстүрлі түрде өтуіне негіз болады.
