Мақтаарал ауданында кезектен тыс ҚР Парламенті мәжілісінің және барлық деңгейдегі мәслихат депутаттарының сайлауына тұрғындар белсене қатысуда. Наурыз мерекесінің қарсаңында өтіп жатқан саяси науқан мерекелік көңіл күймен өтіп жатыр.
Бірнеше этнос өкілдері тұратын Мақтаарал ауылдық округінде орналасқан №428 сайлау учаскесінде қазақ, өзбек, тәжік, қарақалпақ, орыс, татар ұлтының өкілдерінен құралған қыз-келіншектер сайлаушыларға дәм таратты.
Еліміздегі тыныштық пен үндестік, ұлттар арасындағы өзара сенімділікті нығайта түскісі келген топ сайлау күні осындай іс-шара ұйымдастыруды алдын ала жоспарлаған екен. Олар тағдыр тәлкегімен Қазақстан жеріне қоныс аударған түрлі этнос өкілдері болашақтарын осы елмен байланыстыратынын, сондықтан сайлауға белсене қатысып жатқандарын атап өтті.
Қыз-келіншектер тұғырлы татулығымыз бен ырысты ынтымағымыз жаңа белеске көтеріле берсін деген ізгі тілектерін арнап, өздерінің таңдауларын жасады.
Айта кетейік, Наурыз мейрамы қарсаңында өтіп жатқан сайлауда түрлі мерекелік іс-шаралар ұйымдастырылып, концерттік бағдарламалар қойылуда.
