Түркістанда Облыстық мәдениет басқармасының ұйымдастыруымен Республикалық «Түркістан дауысы» әншілер байқауы өтіп жатыр. «Конгресс Холл» көпсалалы кешенінде 17 өнерпаз қатысып жатыр. Түркістан облысының Өңірлік коммуникациялар қызметі алаңында өткен брифингте басқарма басшысы Әзімхан Қойлыбаев байқау ережесі бойынша барлық қатысушы алдымен Қазақстан композиторларының әндерін және өз таңдауындағы әнді орындайтынын айтып, барша қатысушыларға сәттілік тіледі.
Баспасөз жиынында сөз алған Облыстық мәдениет және халық шығармашылығы орталығының директоры Мейіржан Алиакбаров республикалық байқаудың деңгейіне тоқталып, алдын ала өткен іріктеудің оңай болмағанына тоқталды.
– Жаңа есімнің жұлдызын жағатын ән додасына еліміздің 17 өңірінен келген жас дарын иелері қатысады. Бұған дейін 18-35 жас аралығындағы 52 үміткер өнер сайысының іріктеу кезеңіне онлайн форматта өтінім білдіріп, оның 17-сі ұйымдастыру комитетінің шешімімен ақтық кезеңге жолдама алды», – деді Мейіржан Нұрғалиұлы.
Қазылар алқасының төрағасы, танымал әнші-композитор Медеу Арынбаев Түркістан төрінде ән шырқаудың өзі мәртебе екендігін атап өтті. Сондай-ақ қазақ композиторларының әндерін насихаттауы байқаудың құнын арттыра түседі деді. «Құрмет» орденінің иегері, композитор Бейбіт Оралұлы да байқаудың әділ өтетіндігін алға тартып, барлық үміткерге сәттілік тіледі.
Еске сала кетейік, байқау мақсаты – шығармашыл, дарынды жастарды анықтау, оларға қолдау көрсету, халықаралық мәдени, туристік байланысты дамыту және нығайту, қазақ музыкасын әлемдік деңгейде насихаттау. Бүгін Тұран төрінде шын жүйріктер анықталатын болады. Гран-при жүлдесі 2 млн теңге. Сондай-ақ, лауреаттар мен барлық қатысушыға арнайы бағалы сыйлықтар мен диплом табысталады.
Түркістан шаһары соңғы жылдары үлкен руханият ордасына айналып келеді. Оның бір дәлелі – биыл Балалар жылына орай Түркістан қаласында алғаш рет «Жұлдызай» инклюзивті балалар шығармашылығы фестивалі өтті. Ерекше білім беру қажеттілігі бар балаларға арналған еліміздегі жалғыз инклюзивті балалар шығармашылығы әрі қайырымдылық фестивалінің гала-концертіне 200-ге жуық бала қатысты. «Конгресс холл» кешенінің сахнасында лауреаттар өзара және қазақстандық эстрада жұлдыздарымен жұптасып, шығармашылық нөмірлер ұйымдастырды. Гала-концертке Мәдина Сәдуақасова, Тамара Асар, C.Tay, Азат Әбілдаев, Әлинұр Хамзин, Рухия Байдукенова, Қарақат Башанова, «FM» тобы, «Hassak», Qali, «Бастау» тобы, Beibarys және Rise&Abudi сияқты эстрада жұлдыздары қатысты. Еліміздің түкпір-түкпірінен келген өнерлі балалар мен қонақтар Түркістанның ғажайып сәулетіне тамсанып, тарихи шаһар дами берсін деген тілектерін жеткізді.
Биыл 17-рет ұйымдастырылған «Жұлдызай» фестивалінің гала-концертінде ерекше күтімді қажет ететін балалар би билеп, ән шырқады. Музыкалық аспапта ойнады. Бұл концерт ерекше балалардың шығармашылығы арқылы өнердің шекарасы жоқ екенін дәлелдеді. Жұртшылыққа таланттардың ерекше әлемін көрсету миссиясын орындады.
