2022 жыл – Балалар жылына орай, Төлеби аудандық және облыстық мәслихатының бірқатар депутаттары №4 Тасарық арнаулы әлеуметтік қызметтер көрсету орталығына арнайы іссапармен барды.
Халық қалаулылары мүмкіндігі шектеулі балаларды мерекемен құттықтап, мекеменің тыныс-тіршілігімен танысты. Орталық директоры Ләззат Әлімбайқызы депуттарды ұжымның жұмысымен, балалардың шығармашылығымен және мекеменің материалдық-техникалық базасымен таныстырды.
Балаларды қол еңбегіне баулитын ағаш, тігін шеберханаларды, ойлау қабілеттерін дамытатын арнайы бөлмелерді аралаған халық қалаулылары олардың қол еңбегін тамашалады. Орталықтағы 2000-нан астам кітап қоры бар кітапхана, сырттағы футбол, ойын алаңшаларын, жаздық сахна орналасқан гүлзарлы саябақ тазалығымен ерекшеленеді.
Ауласы тал-терекпен, әсем гүлдермен көмкерілген бұл мекеменің жалпы аумағы 4 гектар болса, іскер басшы Ләззат Есназарова бос жатқан жерге биыл түлі сәнді бұталар мен жеміс ағаштарын отырғызуға ұйытқы болыпты. Барлық жас көшеттер жапырақ жайып, жайқалып тұр.
Ләззат Әлімбайқызы мекеменің жылу жүйесін көгілдір отынға ауыстыру, жер астынан су тарту қондырғысы мен су жүйесіне күрделі жөндеу жұмыстарын жүргізу қажеттігі жөніндегі мәселесін ортаға салды.
Төлеби аудандық мәслихатқа «Ақжол» демократиялық партиясынан сайланған депутаттар Ермахан Сарыпбеков пен Азамат Сахов мерекеге қарсаңында демеушілік көмек көрсетіп, балалардың емдік бөлмесіне қажетті жабдықтарын алып берді.
Арнайы орталықтың балалары мүмкіндігі шектеулі болғанымен тұла бойы тұнған өнер дерсің. Тәрбиеленушілер түрлі байқауларға қатысып, аудан, облыста, республикада топ жарып, жүлделі оралған. Бүгін де балақайлар қонақтарға арнайы концерттік бағдарлама ұсынып, әннен шашу шашып, мың бұрала би де билеп берді.
Мәслихат депутаттары Ермахан Әбдіханұлы мен Азамат Саятайұлының балалар жылында жас ұрпаққа қуаныш сыйлап, игілікті істің бастамашысы болып, көпшіліктің алғысына бөленді.
