Қасым-Жомарт Тоқаев 2025 жылға дейін ел аумағында 2 млрд. көшетін отырғызу жөнінде тапсырма берген болатын. Түркістан облысында аудан, қалаларды абаттандыру, көгалдандыру және тазалық жұмыстары облыс әкімінің қатаң бақылауында. Аталған мәселе бүгін де мәжілісте арнайы талқыланып, өзі басқаратын аумақты жайқалтып, абаттандыра алмай жатқан аудан, қала әкімдеріне сын-ескертпелер айтылды.
– Аудандарды абаттандыру, көгалдандыру, тазалығын сақтау мәселесі былтырдан бері айтылып келе жатыр. Бірақ әлі бірде-бір аудан, қалада тиянақты, жүйелі жұмыс жоқ.
Аппарат тарапынан бұл іс қатаң бақылануы тиіс. Әр аудан, қаланың абаттандыру, тазалық жұмыстарын жүргізу, көгалдандыру бойынша нақты іс-шара жоспары және орындалу мерзімі болуы қажет. Осы арқылы бақылап, жоспар орындалмаса шара көреміз. Әсіресе халықаралық автожолдардың жан-жағы таза болуына мән берілсін. Түркістан қаласын таза әрі туристерге қолайлы ету аса маңызды. Мемлекеттік бағдарлама арқылы қоғамдық жұмыспен қамтылған тұрғындарды осы жұмыстарға қатыстыру қажет. Жалпы елді мекендерді тазалықпен қамту, абаттандыру жұмыстарына басқармалар да атсалыссын, – деді Дархан Сатыбалды.
Облыс әкімі аппаратының ұйымдастыру-инспекторлық жұмыс және аумақтық даму бөлімінің басшысы М.Алипов аудан, қалаларды абаттандыру, көгалдандыру және тазалық жұмыстары бойынша зерделеу жұмыстары нәтижесі туралы баяндады.
Бәйдібек, Сайрам, Түлкібас, Сарыағаш, Келес аудандары және Арыс қаласында көшелерде қоқыс жинау, шөптерді ору, кейбір ағаштарды әктеу жұмыстары ғана көрсетілуде. Жол бойындағы үйлерді және олардың қоршауларын ретке келтіру жұмыстарына көңіл бөлінбеуде. Сондай-ақ аудан, қалаларда саябақтарда, скверлерде, демалыс орындарында атқарылып жатқан жұмыстар баяу жүргізіліп жатыр.
Көпқабатты үйлердің қасбеттерін ретке келтіру бойынша Төлеби, Шардара, Ордабасы аудандары мен Кентау қаласы ғана жұмысты бастап отыр. Бірқатар аймақтарда ғимараттың қасбетін әктеу сапасыз жасалған.
Жиында үйлер мен ғимараттарды әктеу-сырлау, жаяу жүргіншілер жолын ретке келтіру, ойын алаңшаларын реттеу, тұрғындарға қолайлы орта қалыптастыру бағытындағы жұмыстарды күшейту жөнінде тапсырма берілді. Сонымен қатар, Түркістан облысы әкімі аппаратының апталық отырысында денсаулық сақтау саласының өзекті мәселелері, жедел медициналық жәрдем қызметінің жай-күйі талқыланды. Облыс әкімі Дархан Сатыбалды денсаулық сақтау саласының техникалық базасын нығайтуға қолдау көрсетілетінін айта келе басқарма басшысы мен бас дәрігерлерге жұмысты ширатуды тапсырды.
– Аудан, қалаларды аралау барысында медицина саласында мәселелер көп екенін аңғардық. Кейбір аймақтарда денсаулық сақтау нысандарының жай-күйі қанағаттанарлықсыз жағдайда. Одан бөлек, тұрғындар тарапынан да өтініштер мен шағымдар түсіп жатады. 1414 бірыңғай байланыс және қолдау орталығы арқылы 221 шағым түскен. Басым бөлігі – Сарыағаш, Сайрам, Түлкібас және Жетісай ауданынан. Сондай-ақ 109 бірыңғай байланыс ортағы арқылы да жедел жәрдем қызметіне қатысты тұрғындардың 25 қоңырауы тіркелген. Олардың көбі жедел жәрдемнің жиі кешігетіні туралы шағымданған. Осы саладағы аталған және өзге де проблемаларды шешуге күш салған жөн. Саралап шығып, толық мәлімет алу керек. Дәрігерлердің қоғаммен байланысын жақсарту, медициналық нысандарды құрал-жабдықтармен қамту ісін жандандыру қажет. Оған қолдау көрсетіледі. Өзекті мәселелерді тұрақты талқылап, көмектесуге дайынбыз, – деді Дархан Сатыбалды.
Түркістан облысы денсаулық сақтау басқармасының басшысы Асхан Байдуәлиевтің айтуынша, өңірдегі 2 миллионнан астам тұрғынға 216 бригаданың күшімен жедел жәрдем қызметі көрсетілуде. Бригада ташылығы сезілуде. Облыстық жедел медициналық жәрдем станциясының 6 қалалық бекеті, 17 аудандық бөлімшесі бар. Жедел медициналық жәрдем станцияларының санитарлық автокөліктердің саны – 190, МСАК жанындағы ЖМЖ 85 автокөлікпен қамтылған. Биыл 4 айда былтырғы осы кезеңмен салыстырғанда жедел жәрдемге қоңырау шалушылар саны көбейген. Былтыр 4 айда 210456 қоңырау қабылданса, биыл 224742 қоңырау түскен.
Жиында тозығы жеткен автокөліктерді жаңа автокөліктермен алмастыру, мамандар, дәрігерлер тапшылығын жою, станциялардың техникалық базасын жаңарту, 103 байланыс қызметін жақсарту мәселелері сараланып, тиісті ұсыныстар берілді. Осы бағытта жұмыстар жүргізіледі.
