Бүгін елімізде Парламент Мәжілісі мен мәслихат депутаттарының сайлауы басталды. Бүгін 12 млн-ға жуық азамат таңдау жасайды. Алдын ала тұрғылықты жері бойынша 11 970 406 сайлаушы анықталды. Сайлаушылардың ең көбі – 1 168 658 сайлаушы Түркістан облысында, ал ең азы – 138 277 сайлаушы Ұлытау облысында тіркелген.
Түркістан облысында 941 сайлау учаскесі таңғы сағат 7-ден өз жұмысын бастады. Аудан-қалаларда тұрғындардың сайлауға келуі белсенді. Алғашқы болып келгендерге арнайы сыйлықтар табыс етіліп жатыр.
Бұл сайлауда барлық деңгейдегі мәслихат депутаттары жаңадан сайланады. Оның үстіне мәжіліс пен барлық деңгейдегі мәслихат сайлауы бірге өткізілуде.
Облыста сайлауға 1 131 кандидат түсіп жатыр. Олардың 19-ы – мәжіліс депутаттығына үміткер. Партиялық тізім бойынша 6 партиядан 79 адам тіркелген. Ұсынылған кандидаттардың 1007-і – ер, 124-і – әйел адам. Ең жасы кішісі – 21-де, ең егде жастағысы – 70 жаста. Сайлаудың әділ, әрі заң шеңберінде өтуін үміткерлердің сенімді өкілдері мен байқаушылар мұқият қадағалап отыр. Олардың арасында халықаралық байқаушылар да бар.
Сайлау учаскелерінде дауыс беру жергілікті уақытпен сағат 07:00-ден 20:00-ге дейін жүргізіледі. Учаскелік сайлау комиссиялары жергілікті уақыт бойынша сағат 20:00-де дауыс санауды, дауыс беру нәтижелері туралы хаттама жасауды бастайды.
