Ауыл шаруашылығы саласын негізгі бағыт еткен Сауран ауданы шаруаларға қолайлы жағдай жасауды алдыңғы кезекке қоюда. Аудан әкімі Ғани Рысбековтың бастамасымен Ескі Иқан ауылдық округінде шаруалармен кездесу өтіп, ағын су тарифіне қатысты мәселелер көтерілді.
Кездесуге Түркістан облыстық ауыл шаруашылық басқарма басшысының орынбасары Т. Оспанов, «Қазсушар» РМК Түркістан облыстық филиалы директоры М.Керимжанов, «Туран-су»МКК бөлімше басшылары және ауылдық окрутегі шаруа қожалықтарының төрағалары, қоғамдастық мүшелері қатысты.
Жиналыстың күн тәртібіндегі мәселе Ескі Иқан ауылдық округіндегі шаруа қожалықтардың егістік алқаптарына қажетті ағын судың тарифтік мәселесі.
Бүгінгі күнге дейін ауылдық округіндегі шаруа қожалықтар ағын суды «Қазсушар» РМК мекемесінен 421 теңгеден, ал, Сауран ауданына қарасты қалған 11 ауылдық округ «Туран-су» МКК мекемесінен ағын суды 251,19 теңгеден алады.
Ескі Иқандық шаруалар «Қазсушар» РМК мекемесіндегі ағын судың тарифтік бағасы «Туран-су» МКК-нен анағұрлым қымбат екендігін айтып, наразылығын білдірген болатын.
Аудан әкімі бұл мәселені шешу үшін арнайы мекеме басшыларымен бірге шаруалармен кездесіп, мәселенің мәніне қанығып, шаруалар үшін тиімді болатын жағдай жасады.
«Ескі Иқандағы шаруалардың көтерген мәселесі өте орынды. Біз бұл мәселеге бей-жай қарамамаймыз. Ауданымызды құрудағы басты мақсаттардың бірі де тұрғындар мен шаруалардың мәселесін шешу. «Су – тіршілік көзі»,- деп бекер айтылмаған. Шаруалардың есіл еңбегі зая кетпеуі үшін ағын судың тарифтік бағасын төмендетуіміз керек. Жаңа Қазақстан құру жолында маңызды мәселелер назардан тыс қалмайды»,- керек деді Ғани Рысбеков.
Ескі Иқан ауылдық округінің шаруа қожалықтары да сенімгерлік басқару негізінде «Қазсушар» РМК мекемесінен «Туран-су» КММ-не өтіп, ағын суды 251,19 теңгеден алатын болады.
Аудан әкімінен қуанышты хабарды естіген шаруалар аудан әкімі мен облыстық ауыл шаруашылық басқармасы басшысының орынбасарына және кездесуге келген мекеме басшыларына алғыстарын айтты.
