Түркістан облысында 11 этномәдени бірлестік жұмыс істеп жатыр. Түркістан қаласында Қазақстан халқы Ассамблеясы Төрағасының орынбасары М. Әзілханов Түркістан облысы ассамблеясының құрылымдары мен этномәдени бірлестіктерінің жетекшілерімен кездесті. Іс-шараға облыс әкімінің орынбасары С. Қалқаманов, Қазақстан Республикасы Ақпарат және қоғамдық даму министрлігі Этносаралық қатынастарды дамыту комитетінің төрағасы Ғ.Шойкин және жергілікті атқарушы органдардың өкілдері қатысты. Кездесуде Мемлекет басшысының «Халық бірлігі және жүйелі реформалар – ел өркендеуінің берік негізі» Жолдауын іске асыруда облыстық Қазақстан халқы ассамблеясының атқаратын қызметі, сондай-ақ өңірдегі этносаралық келісімді нығайту жөніндегі алдағы шаралар талқыланды. Түркістанның және облыстың дамуы ел басшылығының ерекше бақылауы мен жіті назарында.
Түркістан өлкесі – түркі әлемінің киелі жері, ал Түркістан қаласы – оның мәдени және рухани астанасы, қазақ ұлтының қалыптасуының тарихи орталығы. «Мемлекет басшысы күн тәртібіне этносаралық қатынастар саласындағы басты міндет – Қазақстанның көпэтносты халқын болашағы біртұтас ұлтқа біріктіру міндетін қойды. Болашағы біртұтас ұлт қандай болады? Болашағы біртұтас ұлт – мемлекеттік қазақ тілі этносаралық қатынас тілінің рөлін атқаратын азаматтық қауым. Ал қазақстандық патриотизм мен азаматтық қауым елдің барша этностары мен азаматтарының этностық және діни наным-сеніміне қарамастан біртұтас біріктіруші қағидатқа айналады», – деп атап өтті спикер. Сонымен қатар, ҚХА Төрағасының орынбасары Сауран ауданының этномәдени бірлестіктері мен жергілікті атқарушы органдардың өкілдерімен кездесті. Іс-шарада этносаралық өзара іс-қимылды нығайту мәселелері талқыланып, этносаралық қатынастарға ықпал ететін нақты әлеуметтік мәселелерді шешуге баса назар аударылды.
Айта кетейік, Түркістан облысы халқының құрамы саналуандығымен ерекшеленеді, өңірде 50-ден астам этностар мен этностық топтардың өкілдері тұрады. Облыста 11 этномәдени бірлестік (өзбек, славян, түрік, күрд, иран, тәжік, шешен-ингуш, татар-башқұрт, әзірбайжан, грек және «Ынтымақ» этносаралық этномәдени бірлестігі) бар, аудандар мен қалаларда 7 филиал және 14 өкілдік жұмыс істейді.
Осы тұста, Түркістан қаласында облыстық Қазақстан халқы Ассамблеясы жанындағы құрылымдар мен этномәдени бірлестіктердің отырысы өтті.
Аталған отырысқа Түркістан облыстық Қазақстан халқы Ассамблеясы жанындағы құрылымдардың, этномәдени бірлестіктердің жетекшілері мен мүшелері, “Қоғамдық келісім” КММ-нің басшылығы мен қызметкерлері, БАҚ өкілдері қатысты.
Келелі кездесуге Түркістан облысы әкімінің орынбасары Бейсен Тәжібаев модераторлық етіп, бұл басқосудың ел бірлігін нығайтуда маңызы ерекше екенін атап өтті. Облыс әкімінің орынбасары азаматтарды ашық әрі еркін пікір алмасуға және сұхбаттасуға шақырды.
Елдік мұраттың сәтті жүзеге асуы халықтың ынтымақ-бірлігіне тікелей байланысты. Бұл орайда, Президент тапсырмасы аясында өңірімізде мемлекеттік бағдарламаларды халыққа кеңінен түсіндіру бойынша ақпараттық-насихаттық топтың жұмысы сәтті жүргізіліп келеді. Осы орайда айтарым, ауылдардағы жастарды мемлекет ұсынған гранттарға тартуды әлі де жандандыра түсу керек. Оның ішінде, отбасына салмақ салмай осындай тегін оқуларға түсіп, тіпті шәкіртақы алуға мүмкіндік бар. Мәселен, былтыр облыс колледждеріне 17 мың грант бөлініп, оның 11 110-ы игеріліп, қалған 5 900 орыны игерілмей, кері қайтарылған болатын. Ал биыл республикалық бюджеттен қаралған 15 300 грант 43 колледж арқылы толық игерілді. Өткен жылмен салыстырғанда колледж студенттері 4 мыңға көбейді. Сондай-ақ облыста «Ауыл аманаты» жобасы сәтті жүзеге аса бастады. Биыл жоба шеңберінде Түркістан облысына 20 млрд теңге бөлінді. Оған өңірдегі 16 ауданнан 64 ауылдық округ қатысты. Нәтижесіне қарай жыл сайын қатысатын ауылдар саны артады. Бұдан бөлек, жастардың әлеуетін көтеруге бағытталған «Жастар практикасы», «Серпін» бағдарламалары бар. Осы бағдарламаларды Қазақстан халқы Ассамблеясы жанындағы құрылымдар мен этномәдени бірлестіктермен күш біріктіре отырып, аудан, қалаларда насихаттауды жалғастыруымыз қажет.
Бірлікке үндеген басқосуда облыстық ҚХА жанындағы Ақсақалдар кеңесінің төрағасы Созақбай Әбдіқұлов, облыстық тәжік этномәдени бірлестігінің төрағасы Юлдаш Сұлтанов, облыстық ҚХА жанындағы Ғылыми-сарапшылық топ жетекшісі Сейдулла Садықов, облыстық ҚХА жанындағы Аналар кеңесінің төрайымы Гүлсара Тоққұлова, облыстық ҚХА жанындағы Медиация кеңесінің төрағасы Бақытжан Бейсембаев, облыстық ҚХА жанындағы Журналистер мен блогерлер клубының жетекшісі Ерсұлтан Әмірбек атқарылған жұмыстар бойынша мазмұнды баяндама жасап, алдағы жоспар-жобаларымен бөлісті.
Басқосу ары қарай сұрақ-жауап түрінде өрбіп, жиынға қатысушылар өзекті мәселелер төңірегінде ұсыныс-пікірлерін ортаға салды.
Жиын соңында өңірімізде қоғамдық келісім мен этносаралық бірлікті нығайтуға белсенді үлес қосып жүрген бірқатар азаматтар марапатталды. Оларға Түркістан облысы әкімінің орынбасары Бейсен Тәжібаевтың Алғыс хаты табыс етілді.
Еске сала кетсек, Президент тапсырмасын іске асыру мақсатында таяуда Түркістан қаласының әкімшілік-іскерлік орталығында «Достық үйі» ғимаратының алғашқы кірпішін қалау рәсімі өтті. 4 қабатты ғимараттың құрылысы 2024 жылы қараша айында аяқталып, пайдалануға берілмек.
