Бүгін – қазақтың біртуар ақыны Абай Құнанбайұлының туған күні. Үкімет қаулысымен Абайдың 175 жылдығында елімізде 10 тамыз Абай күні деп бекітілген болатын.
Бірлік пен татулықтың ордасына айналған Түркістан облысында һакім Абайдың өлеңдерін оқып, сусындап өскен этнос өкілдері аз емес. Бүгінгі мерейлі күнде өңірдегі Қазақстан халқы Ассамблеясының мүшелері ұлы Абайдың әндерін шырқап, өлеңдерін оқып, жұрттың алғысына бөленді. Бұл ретте, әлеуметтік желі қолданушылары ақынның өлеңдерінен, қара сөздерінен үзінді оқып, өз парақшасына видео жүктеген.
«Ассамблея жастары» РҚБ-нің Түркістан облысы өкілдігі төрағасының орынбасары Индира Раван-Нахчивани Тәуелсіз ел ұрпақтары үшін ұлы Абайдың өлеңдері нағыз патриоттарды тәрбиелеуде үлесі мол екенін айтады.
– Абай шығармашылығы үлкен тәрбие негізі деп ойлаймын. «Адамзаттың бәрін сүй, бауырым деп» кейінгі ұрпаққа биік сөз қалдырған Абайдың ел бірлігін нығайтудағы рөлі тіпті ерекше. Ақынның философиясы, өлеңдерінің тереңдігі бізге құнды мұра болары анық. Сондықтан Абайды оқу керек, білу керек және де оның сөздеріне құлақ салу керек деп санаймын. Өз басым бала күннен ақынның өлеңдерін оқып өстім. «Желсіз түнде жарық ай» әнін жиі орындаймын. Әсіресе, жастарды білім мен ғылымға шақыратын, мақсатыңа жету жолында қажет асыл қасиеттерді атап көрсеткен «Ғылым таппай мақтанба» өлеңі ерекше шабыт береді. Замандастарым һакім Абайдың даналығынан, өлеңінен нәр алатын болса, онда өсу де сапалы білім де бәрі біздің жастардың бойынан табылатындығы сөзсіз, – дейді ол.
Ұлы Абайдың шығармашылығын дәріптеген бүгінгі мерейлі күнде өңіріміздегі этномәдени бірлестіктердің өнерпаз мүшелері де белсенділік танытты. Олар әндерімен шашу шашып, ақынның дана сөздерін ұлықтады.
