Жаңа жыл қарсаңында «AMANAT» партиясы Түркістан облыстық филиалы Атқарушы хатшысының орынбасары, Түркістан облыстық мəслихатының депутаты, Түркістан облысының Құрметті азаматы Қалыйма ЖАНТӨРЕЕВА Кентау қаласындағы көпбалалы отбасылардың балаларына мерекелік сыйлық үлестірді.
– Жұрттың асыға күтетін мерекелерінің бірі — Жаңа жыл. Кішкентай баладан, еңкейген қарияға дейін Жаңа жылдан өзіне жақсылық, өзгерістер күтеді. Ата-ананың, ұстаздарыңның айтқанын тыңдап, сабақты жақсы оқу, өзгелерге үлгі, өнеге көрсету — сендердің басты міндеттерің. Сендер неғұрлым білімді, тәрбиелі болсаңдар, болашақта үлкен азамат болып, еліміздің дамуына үлес қосасыңдар, – дей келе халық қалаулысы алдымен тоғыз балалы Алдиярова Нұрсәуленің отбасына, тоғыз балалы Дәулетияр Сабиляның отбасына және әлеуметтік аз қамтылған отбасы, зейнеткер Сабиева Сәуленің немерелеріне арнайы Жаңа Жылдық тәтті сыйлықтарын табыстады.
– Қаламыздағы он шақты отбасының үйлеріне барып, жалпы 50 балаға осындай сыйлық табыстадым және сыйлық алған отбасылардың қуаныштарында шек болмай, өз алғыстарын білдірді. Әсіресе көпбалалы отбасындағы бүлдіршіндерге тәттілер табыстағанда әсері ерекше болды. Әрқайсысы бір-бір сыйлықтан ұстап тұрғанда өзімнің бал дәурен балалық шағымды еске түсірдім. Әкетайымның жұмысынан үйдегі сегізімізге де тәтті сыйлық беріп жіберетін. Сыйлық таусылғанша ұйықтағанда жастығымыздың астына басып ұйықтайтайтынбыз. Кейде шокаладтары еріп жастықтың тысын бүлдіріп қоятын еді. Сабырлы анамыз ләм демей оны ауыстырып қоятын. Еріксіз жымидым, балалармен бірге қуандым. Қай заманда болса да баланың аты бала. Бала үшін тәттіден артық Жаңа жылда сыйлық жоқ. Өмірлерінде тәтті сәттері мол болсын! – деп жүрекжарды тілегін білдірді облыстық мәслихат депутаты Қалыйма ЖАНТӨРЕЕВА.
