Сайрам ауданының әкімі Ұласбек Сәдібековтің тапсырмасына сәйкес, әкім орынбасары М.Оразалиев және тиісті бөлім басшысы, жауапты қызметкерімен бірге Қайнарбұлақ ауылдық округіне қарасты Қасымбек датқа ауылындағы Е.Сарманов көшесінде орналасқан коммуналдық-арендалық көпқабатты тұрғын үйлердің тұрғындарымен кездесті.
Кездесу барысында тұрғындар тарапынан коммуналдық-арендалық көпқабатты тұрғын үйлердің сарқынды қалдық сулар құйылатын орнын тазалау мәселесі көтеріліп, шешу жолдары талқыланды. Сарқынды қалдық сулары құйылатын (септик) орнын қазу үшін сметалық құжаттары дайындалып, жергілікті бюджет есебінен қажетті 4 515,724 мың теңге қаржы қарастырылды. Алдағы уақытта құрылыс жұмыстары басталатын болады.
Одан бөлек, кездесуде заңсыз тұрып жатқан және жалға берілген пәтерлерде тұрмайтын 17 отбасыға 2022 жылдың 25 маусымына дейін пәтерді босату немесе келісімшартқа сәйкес өздері тұру қажеттілігі туралы ескерту парақшалары таратылды.
Мадияр Мұхтарұлы елді мекеннің тұрғындарының шағымын бақылауына ала отырып, жергілікті жердің тазалығын сақтау, өздерінің тұрғылықты үйлеріне қарап, күтім жасау жөнінде түсіндірді.
