Бүгін Түркістан облыстық кәсіпкерлер палатасында кәсіпкерлерді сыбайлас жемқорлық тәуекелдерінен қорғау мақсатында Түркістан облысы бойынша Сыбайлас жемқорлыққа қарсы қызмет Департаменті басшылығының қатысуымен кәсіпкерлерді жеке қабылдау шарасы өтті.
Кездесуге Түркістан қаласы мен Шардара, Бәйдібек, Ордабасы, Сайрам, Отырар, Созақ, Қазығұрт аудандарының кәсіпкерлері онлайн және офлайн бағытта қатысып, өз кәсіптері жайында баяндады.
Облыстық Антикор кәсіпкерлерді қорғау бойынша «Бизнеске жол» жобасын іске қосқан болатын. Жоба бизнестің дамуына кедергі келтіретін түрлі әкімшілік кедергілерді болдырмау мақсатында қызмет атқарады. Сонымен қатар, лауазымды тұлғалар қабылдайтын шешімдердің мерзімдері мен ашықтығын сақтауды қамтамасыз етеді.
Түркістан облысы бойынша сыбайлас жемқорлыққа қырсы күрес департаментінің превенция басқармасының басшысы Ержан Жүнісовтың айтуынша, жұмыс күндері сағат 10:00 мен 18:00-ге дейін жоба аясында әрбір кәсіпкердің мәселесін жеке тыңдап, оны шешу жолдары қарастырылады.
Сондай-ақ, әр дүйсенбі күні сағат 15:00 мен 16:00 аралығында «Атамекен» облыстық кәсәпкерлер палатасында кәсіпкерлер үшін арнайы жеке қабылдау өткізіледі.
«Осыдан бірнеше ай бұрын «Түркістан әлеуметтік кәсіпкерлік корпорациясы» мекемесі үш жылдан бері жүргізіп келе жатқан кәсібіме келісімшарт талабын бұздың деп айыппұл салған болатын. Бұл біз сияқты қарапайым кәсіпкерлер үшін қомақты қаражат әрі аядай кәсібіміздің жандануына үлкен кедергі болды. Кейіннен облыстық Антикор мен Кәсіпкерлер палатасының қызметкерлеріне жүгініп, өтінішімізді жеткіздік. Көп ұзамай мәселеміз оң шешімін тауып, қомақты айыппұлдың мөлшері қысқарды. Осы жолы Антикордың кәсіпкерлерді қорғауға айрықша назар аударатынын көрдім және департамент басшылығына алғысымды жеткізгім келеді», – деді жеке кәсіпкер Гаухар Бабажанова.
Айта кетсек, мекеме қызметкерлері бизнес өкілдерін жерді рәсімдеу, сәулет және басқа да бақылаушы органдардан рұқсат алу, коммуникацияларды қосу кезінде немесе мемлекеттік қолдауды, яғни несиелер мен гранттар, субсидиялар алу кезінде кедергілер туындап жатса, 1424 call орталығына хабарласуды сұрайды
