Келес ауданы әкімдігінің ұйымдастыруымен, келестік айтыскер ақын Жарқынбек Наушабековты еске алуға арналған «Жыр жүйрігі – Жарқынбек» атты республикалық ақындар айтысы өтті. Келестегі айтыс аламанында республикаға танымал ақындармен қатар облысымыздың жас ақындары да сынға түсті. Жыр додасының ашылу салтанатында ақындарға аудан әкімі сәттілік тіледі.
– Қазақ жанының айнасындай болған айтыс қай заманда болмасын қилы тағдырды, тарихымызды көрсетіп, ұлттық болмысымызды, тұрмысымызды ерекшелеп, бүгінімізді бағдарлап, келешегімізді кемелдеп отырған. Осы орайда Наушабеков Жарқынбек Абазбекұлының құрметіне «Жыр жүйрігі Жарқынбек» атты республикалық ақындар айтысы өткізілуде. Жарқынбек Абазбекұлы жалпы айтыс өнеріне араласқалы бері 20-ға жуық бас жүлде жеңіп алып, бірнеше рет «темір тұлпар» иеленген. Айтыс атадан балаға мирас болып келген халқымыздың рухани мәдениетінің бірі. Алдағы уақытта мұндай мәдени іс-шараларымыздың қатары көбейіп, ауданымыздың мәдени-рухани әлеуеті артатын болады. Ұлы бабаларымыздың жолын жалғастырып, төл өнерімізді насихаттап жүрген айтыс ақындарына сәттілік тілеймін, – деді аудан әкімі Ақментай Есбаев.
Текті өнерді төрге оздырып, ұлт мұрасы ұлықталған жыр додасында қазіргі қоғамдағы жайттар, құрдастар әзілі, жеңге мен қайын іні, жастық жалын, іні мен аға сыйластығы көрініс тапты.
Жыр додасында ІІІ орынды шымкенттік Анар Жаппарқұлова мен Карима Оралова қанжығаларына байлады. Сөз бәйгесінің ІІ орыны Нұр-Сұлтан қаласынан келген Дәурен Ысқаққа бұйырды. Бірінші орынды Түркістаннан келген Бекарыс Шойбеков иемденсе, бас жүлдені Арқалықтан келген Алаштың аяулы ақыны Айбек Қалиев иеленді. Айтыскер ақындарға арнайы дипломдар мен бағалы сыйлықтар табысталды.
Айта кетейік, биыл Түркістанда «Ұлыстың ұлы күні – Наурыз» мерекесіне орай «Түркістан – ер түріктің бесігі» атты республикалық ақындар айтысы өтті. Қазақстан Республикасы Мәдениет және спорт министрлігі Мәдениет комитетінің қолдауымен, «Әзірет Сұлтан» мемлекеттік тарихи-мәдени музей-қорығы ұйымдастырған айтыстың мақсаты түркі әлемінің киесі мен қасиетіне айналған Қожа Ахмет Ясауи және кесене мен оның айналасында жерленген тұлғаларды дәріптеу, Түркістан жайлы тағылымды ой бөлісу, халыққа насихаттау болатын. Қазылар алқасының шешімімен бірінші орынға түркістандық азулы ақын Бекарыс Шойбеков лайық деп танылса, Нұр-Сұлтан қаласынан келген Еркебұлан Қайназаров екінші орынды, қызылордалық Ержан Әміров пен шымкенттік ақын Нұрлыбек Мейірманов үшінші орынды иеленді. Сондай-ақ, Қаныбек Сарыбаев атындағы арнайы жүлдемен қызылордалық Мейірбек Сұлтанхан, Әбдікерім Манапов атындағы арнайы жүлдемен Алматы облысынан Шұғайып Сезімхан, Көпбай Омаров атындағы арнайы жүлдемен Біржан Байтуов, Әселхан Қалыбекова атындағы арнайы жүлдемен Түркістан облысынан Дәурен Ақсақалов марапатталды.
