Президент Қасым-Жомарт Тоқаев апатты және үш ауысымдағы мектептердің проблемасын шешуді, білім беру ошақтарында күрделі жөндеу жұмыстарын уақтылы жүргізуді тапсырған болатын. Осы бағытта Келес ауданында жыл өткен сайын тозығы жеткен білім ошақтары жөндеуден өткізіліп, оқушылардың сапалы білім алуына қолайлы жағдай жасалып жатыр. Биыл аудандағы Біртілек ауылдық округіндегі №11 Жолбасшы және Қошқарата ауылдық округіндегі №28 Мақташы мектептерінде жөндеу жұмыстары қарқынды.
«Ауданда жалпы 65 мектеп болса, соның екеуі – жеке меншік білім беру ұйымы. Қалған мектептер – мемлекеттік. Жыл сайын бөлім тарапынан ғимараттарға зерделеу жұмыстарын жүргіземіз, жөндеуді қажет ететін мектептерге сұраныс береміз. Нәтижесінде биыл екі мектеп күрделі жөндеуден өтіп, пайдалануға берілсе, екі мектептің құрылыс жұмыстары басталып, бүгінгі таңда әрі қарай жалғасып жатыр», – дейді Келес аудандық адами әлеуетті дамыту бөлімінің басшысы Бақтияр Абдиев.
Сонымен қатар, ауданда «Ауыл – ел бесігі» бағдарламасы аясында Ошақты ауылдық округі, Ошақты елдімекеніндегі №46 Абай атындағы жалпы орта мектебіне қосымша 300 орындық оқу корпусы, асхана, спорт зал құрылысы жүргізіліп жатыр. Одан бөлек, Қошқарата ауылдық округі, Бесқұбыр елдімекеніндегі С.Сейфуллин атындағы жалпы орта мектебіне 300 орындық оқу корпусы, асхана, спорт зал нысанының құрылыс-монтаж жұмыстары жалғасып жатыр. Қос мектепті жыл соңына дейін қолданысқа беру жоспарланған.
Келес ауданының дихандары астық оруды бастап кетті. Агротехникалық талаптарды тиянақты атқарған Ақтөбе ауылдық округіндегі «Дәурбек» шаруа қожалығы қазір егістіктің әр гектарынан 23-25 центнерге дейін өнім жинап жатыр. Соның нәтижесінде биыл қамбаға мол дән құйылмақ. Аталған шаруа қожалығы 423 гектар аумаққа бидай еккен. Шаруашылықта жер жырту, тұқым себу және жерді өңдеу секілді жұмыстар дер уақтылы істелген. Соның арқасында қазір қырманға мол астық тасылып жатыр. «Дәурбек» шаруа қожалығы 30 адамды жұмыспен қамтып отыр. Қазір 2 комбайн, 5 камаз, 1 трактор жұмыс істеуде. Айта кетейік, биыл Келес ауданында 8 397 гектар аумаққа астық дақылдары егілсе, оның 1 830 гектары бидай, 5 138 гектары дәндік жүгері дақылдары себілген. Одан бөлек 407 гектар аумаққа бұршақты дақылдар егілді.
1 маусым – Халықаралық балаларды қорғау күніне орай Түркістан облысының Келес ауданында ашық спорт алаңшасы ел игілігіне берілді. Біртілек ауылдық округінде орналасқан спорт алаңшасының ашылу рәсіміне ауылдық округі әкімі, аудандық мәслихаттың депутаттары мен ауыл тұрғындары қатысты.
– Мемлекет басшысының бұқаралық спортты дамыту, балаларға спорттық инфрақұрылымның барынша қолжетімді болуын қамтамасыз ету тапсырмасына сәйкес, осы жылы балалар және спорт алаңшаларын орнату жұмыстарына қажетті қаржы қаралып, ауылдарды абаттандыру, спорт алаңшаларын құру жұмыстары жүргізілуде, – деді ауылдық округінің әкімі Кеңес Халық. Спорт алаңшасының ашылу салтанатында шағын футболдан жарыс өткізіліп, жеңімпаздарға сыйлықтар табысталды. Айта кетейік, Келес ауданы қайта құрылғалы бұқаралық спортты дамытуға басымдық берілуде. Бүгінге дейін Абай және Ұшқын ауылдарында орталық алаңдар жөндеуден өткізілсе, 5 спорт алаңы салынды. Биылғы жоспар аясында Қошқарата және Біртілек ауылдық округтерінде ашық спорт алаңшасын ел игілігіне табыстау көзделген.
Сонымен қатар, Түркістан облысының және Келес ауданының құрылғанына 5 жыл толуына орай Қошқарата ауылдық округінің Мақташы және Алғабас елді мекендеріне табиғи газ берілді. Тұрғындардың қуанышымен бөлісуге Келес ауданының әкімі Жәнібек Ағыбаев арнайы барып, табиғи газды қосу рәсіміне қатысты.
– Түркістан облысының әкімі Дархан Амангелдіұлы елді мекендердегі газға қатысты жобаларды жедел аяқтап, газдандыру жұмысын жандандыруды тапсырған болатын. Өңірде осы бағытта жұмыстар жүруде. Бүгін Келес ауданына қарасты Қошқарата ауылдық округінің Мақташы және Алғабас ауылындағы 258 үйді газға қосуға мүмкіндік туып отыр. Баршаңыздың шаңырақтарыңызға амандық, саулық және жылулық тілеймін, – деді аудан басшысы.
Аудан әкімі Жәнібек Есенұлы салтанатты рәсімнен соң жергілікті тұрғындармен тілдесіп, олардың пікірлері мен ұсыныстарын тыңдады. Аудан аумағында атқарылып жатқан шараларға тоқталып, алдағы жоспарлармен бөлісті. Айта кетейік, Келес ауданында 133 753 тұрғын, 83 елді мекен бар оның ішінде 60 елді мекен табиғи газбен қамтылған. Яғни елді мекендердің 72,3%, тұрғындардың 94,4% газдың игілігін көріп отыр (бүгінгі таңда 14 361 абонент бар). Биыл Келес ауданы бойынша 9 елді мекенді табиғи газға қосу жұмыстары жүргізілуде.
Бұдан бөлек, Келес ауданында бұқаралық спортты дамыту және халық арасында салауатты өмір салтын насихаттау мақсатында салынып жатқан нысандардың қатары тағы біреуімен толықты. Халық тығыз орналасқан Біртілек ауылдық округінде жаңа футбол алаңы пайдалануға берілді. Ораз ата елді мекенінде бой көтерген спорттық нысанды кәсіпкер Батырхан Исаев өз қаражаты есебінен салды. Жабық ғимаратта орналасқан жасанды алаң кез-келген мезгілде доп тебуге ыңғайлы. Футбол алаңының ашылу салтанатына ақсақалдар, ауыл азаматтары қатысты.
– Жалпы, ауылымызда дәл осындай спорт нысанын салу қажет еді. Жақында ғана осы елді мекенде мемлекет қаражаты есебінен жаңа ашық спорт алаңы пайдалануға берілді. Ел игілігіне арналған жобаларды жүзеге асыруда кәсіпкерлер тарапы да қарап қалмай, өз септігін тигізуде. Алдағы уақытта осы алаңда доп тепкен жасөспірімдеріміз еліміздің абыройын асқақтатар тұлға болып жетілуіне тілектеспін. Өз өмірін кәсіби спортпен байланыстырғысы келетіндер осы спорт кешеннен табылатынына сенімдіміз, – деді кәсіпкер Батырхан Исаев.
Айта кетейік, ашылу салтанаты аясында ас беріліп, турнир ұйымдастырылды. Ойын тартысты өтіп, жеңімпаз бен жүлдегер командаларға, үздік ойыншыларға демеушілер тарапынан арнайы мақтау қағаздары мен дипломдар табысталды.
Сонымен қатар. жуырда Келес ауданына қарасты Қошқарата ауылдық округінің Жаңақоныс, Бесауыл, Жамбыл-1 елді мекендеріне табиғи газ берілді. Келес ауданының әкімі Жәнібек Ағыбаев үш ауылға көгілдір отын қосу рәсіміне қатысты. Аудан әкімі газбен қамту – өңірдің тұрғын үй-коммуналдық шаруашылығын дамытудағы негізгі басымдықтар екенін атап өтті.
— Жыл сайын Келес ауданындағы елді мекендер табиғи газға қосылып, жергілікті тұрғындар көмір мен отын жағудың азабынан арылуда. Аудан қайта құрылғалы 14 ауылға табиғи газ берілсе, жыл соңына дейін 9 ауылға табиғи газ берілуі жоспарланып отыр. Солардың қатарында міне бүгін Бесауыл, Жаңақоныс және Жамбыл-1 елді мекендерін табиғи газга қосып отырмыз, – деп аудан әкімі жиналғандары қуаныштарымен құттықтады.
Аудан басшысы Бесауыл елді мекенінің тұрғыны Мұратбек Бектұрсыновтың шаңырағында болып, 90-ға келген қарт әжейдің батасын алды. Шаңыраққа келген көгілдір отынды жағып, жергілікті тұрғындармен тілдесті. Сонымен қатар, газ мамандары тұрғындарға көгілдір отынды қауіпсіз пайдалану ережелері көрсетілген жадынамаларды таратты. Айта кетейік, Келес ауданында 133 753 халық, 83 елді мекен бар оның ішінде 60 елді мекен табиғи газбен қамтылған, яғни елді мекендердің 72,3%, халық санының 94,4% қамтылған (бүгінгі таңда 14 361 абонент бар). Биылғы жылы Келес ауданы бойынша 9 елді мекен табиғи газға қосылу жұмыстары жүргізілуде, оның ішінде 3 елді мекен Қошқарата ауылдық округі, Жаңақоныс, Бесауыл, Жамбыл-1 елді мекендері бүгін қосылып, Келес ауданы бойынша тағы 307 тұрғын үйді табиғи газға қол жеткізіп отыр.Елді мекендерді табиғи газбен жабдықтау бойынша құрылыс-монтаждау жұмыстары жергілікті әкімдіктің тапсырысымен 2021 жылы басталған. Газға қосылу Ғани Мұратбаев газ тарату станциясынан (ГТС) қуаттанатын болады.
Түркістан облысының әкімі Дархан Сатыбалды көктемгі дала жұмыстарын тиімді ұйымдастыру және шаруаларды ағын сумен қамту бағытында тиісті мекемелерге нақты тапсырмалар жүктеген болатын. Облыс басшысы «Тұран су» мекемесі мен аудан, қала әкімдіктеріне шаруааралық каналдарды механикалық тазалау жұмыстарына қажетті техникаларды жұмылдырып, маңызды істі бірлесе атқаруды тапсырған еді. Су арналарын тазалау жұмыстары бүгінде бірлескен түрде Келес ауданында жүзеге аспақ. Бұл ретте «Тұран су» ШЖҚ МКК арнайы техникалары тоқтаусыз жұмыс атқаруы көзделген.
– Облыс басшысының бастамасы, аудан әкімінің нақты тапсырмасымен Келес ауданындағы ағын су жүйелеріне зерделеу жүргізе келе механикалық тазалауды қатты қажет ететін аумақты тазалау жұмыстары басталды. «ҚазСуШар» РМК мекемесі өз теңгеріміндегі В-15, В-24 және Аққойлы каналдарының 12 шақырымын тазалауды бастап кетті. Жоспарлы жұмыстар жалғасатын болады, – дейді аудандық су шаруашылығы мекемесінің директоры Жасұлан Қылышбаев.
Келес ауданында коммуналдық меншіктегі ұзындығы 157 шақырымды құрайтын каналдар механикалық тазалаудан өткізіледі. Бұл жұмыстар су беру маусымында өз тиімділігін көрсетіп, егістікке баратын ағын су шығынын азайтуға мол септігін тигізбек.
