Бүгінгі таңда Келес ауданында өнеркәсіп пен кәсіпкерлік саласын дамытуға басымдық беріліп отыр. Бұл бағыттағы жұмыстар нақты жобалармен, инвестициялық серпінмен және жаңа өндіріс орындарының көптеп ашылуымен қуантып келеді.
Таяуда Келес ауданының әкімі Жәнібек Ағыбаев Түркістан облысының «Еңбек мобильділігі орталығы» коммуналдық мемлекеттік мекемесінің директоры Абзал Қазанғаповты қабылдап, өңірдегі жұмыспен қамту саласының қазіргі жай-күйімен жан-жақты талқылаған болатын. Кездесу барысында екіжақты ынтымақтастықты нығайту, жұмыссыздық деңгейін төмендету, еңбек нарығын тұрақтандыру және жаңа жұмыс орындарын ашу мәселелері сөз болды.
Аудан әкімі Келес өңірінде жұмыссыздықтың алдын алу бағытында атқарылып жатқан нақты шаралар мен қолға алынған жобалар жөнінде кеңінен баяндап өтті. Атап айтқанда, қысқа мерзімді кәсіптік оқыту, әлеуметтік жұмыс орындары мен қоғамдық жұмыстар арқылы халықты жұмыспен қамтуда оң нәтижелерге қол жеткізілгенін атап өтті.
Абзал Дәулетәліұлы Келес ауданында жүзеге асырылып жатқан шараларды оң бағалап, алдағы уақытта еңбек ресурстарын тиімді үйлестіру бағытында бірлескен жұмыстар жүргізілетінін жеткізді. Кездесу қорытындысы бойынша тараптар алдағы кезеңде жұмыспен қамту саласындағы өзара іс-қимылды күшейтуге уағдаласты.
Жалпы, былтыр аудан бойынша 5,4 миллиард теңгенің өнеркәсіп өнімі өндірілді, бұл жоспарланған көрсеткіштен көп жоғары. Нақты көлем индексі 103,1 пайызды құрап отыр. Өнеркәсіптегі өсім негізінен минералды және алкогольсіз сусындар, күйдірілген қыш шығаратын, электр энергиясы мен темірбетон бұйымдарын өндіретін кәсіпорындардың есебінен қалыптасты.
Ал, биылғы жылдың алғашқы үш айының қорытындысы бойынша өнеркәсіп өнімі 1,8 миллиард теңгеге жетті. Бұл да аудан экономикасының тұрақты дамып келе жатқанын көрсетеді. Жыл соңына дейін өнеркәсіп өнімінің көлемін 6,2 миллиард теңгеге жеткізу жоспарланып отыр.
Аталған көрсеткіштерге қол жеткізу мақсатында бірқатар жаңа өндіріс орындарын ашу көзделген. Атап айтқанда, Ақтөбе ауылында қыш зауыты, асфальт және темірбетон бұйымдарын шығаратын зауыт, сондай-ақ гофра-картон өндіретін кәсіпорын пайдалануға беріледі деп жоспарлануда. Сонымен қатар, Жүзімдік ауылынан минералды сусындар шығаратын зауыт ашу жоспарға енгізілген.
Ауданда жеке инвестиция тарту арқылы жаңа жұмыс орындарын ашу бағытында да үлкен жұмыстар атқарылуда. Өткен жылы жеке кәсіпкерлердің қаржысы есебінен жалпы құны 3,8 миллиард теңгені құрайтын 10 жоба іске асып, нәтижесінде 235 адам тұрақты жұмыспен қамтылды.
Ал, биыл инвестиция тарту көлемі еселеп өсіп, жалпы құны 63,2 миллиард теңгені құрайтын 5 ірі жобаны іске асыру көзделіп отыр. Бұл жобалар аясында 2 180 жаңа жұмыс орны ашылады деп күтілуде. Атап айтқанда, «Еcoculture-Еurasia» жауапкершілігі шектеулі серіктестігі 500 гектар аумақта жылыжай кешенін салуды жоспарлап отыр.
Жобаның жалпы құны 42 миллиард теңгені құрайды. Сонымен қатар, «Нурболат» өндірістік кооперативінің бастамасымен құны 20 миллиард теңге болатын «Азия Мед» медициналық орталығының құрылысы қолға алынбақ. Бұдан бөлек, «Қонысбаев Б.» ЖК есебінен 400 миллион теңгеге қонақүй салынбақ.
Сондай-ақ, «Giga Group» ЖШС ауданда асфальт және темірбетон бұйымдарын шығаратын зауыт салуға кірісіп, бұл жобаға 350 миллион теңге көлемінде инвестиция бағыттап отыр. Ал, «Дюсенбаев Е.» ЖК тарапынан құны 500 миллион теңге болатын мейрамхана салынады.
Аталған бастамалар аудан экономикасын әртараптандырумен қатар, жаңа жұмыс орындарын ашуға, халықтың әл-ауқатын арттыруға және инвестициялық ахуалды жақсартуға айтарлықтай үлес қосады. Жобалардың табысты іске асуы Келес ауданының алдағы жылдардағы дамуына берік негіз қаламақ.
Бүгінде Келес ауданындағы 83 елді мекеннің 64-і орталықтандырылған ауыз сумен қамтылған. Бұл халықтың ауыз сумен қамтылу деңгейінің 88,4 пайызға жеткенін көрсетеді. Дегенмен, 19 елді мекенде ауыз су жүйесі әлі толық жүргізілмеген.
Қазіргі уақытта аталған 19 елді мекеннің 14-інде құрылыс-монтаждау жұмыстары қарқынды жүргізілуде. Олар, Ақжол, Қауыншы Оңтүстік, Ғ.Мұратбаев, Қаратөбе, Қосөткел, Жуантөбе, Жаңадәуір, Кеңдала, Ескіқорған, Құйған, Қияжол, Көгерту, Ақжар елді мекендері.
Жаз мезгілінде ауыз су тұтыну көлемінің артуына байланысты Абай ауылындағы кейбір мөлтек аудандарда судың тапшылығы байқалды. Бұл мәселені уақытша шешу мақсатында су тасушы көліктер арқылы ауыз су тасымалдау кестесі бекітіліп, тұрғындарға жүйелі түрде жеткізіліп жатыр.
Сонымен қатар, Абай ауылындағы 4 аумақтағы су тазартатын модульді құрылғылар жөндеуден өтіп, толықтай іске қосылды. Қазіргі таңда тұрғындар сол нүктелерден қауіпсіз әрі сапалы ауыз суды еркін пайдалана алады.
Аудан бойынша ауыз су мәселесін түбегейлі шешуге бағытталған ірі жоба — «Түркістан облысы Келес ауданы елді мекендері үшін су жинау имараты мен жеткізуші су құбырларының құрылысы» қолға алынды. Жобаны «МПК Проект» жауапкершілігі шектеулі серіктестігі әзірлеуде.
Жоба аясында Алпамыс батыр ауылдық округінде 4 гектар жерге 20 000 текше метрлік су қоймасын және Біртілек ауылдық округіне қарасты Көлтоған елді мекенінде 1 гектар аумаққа 600 текше метрлік су қоймасын салу жоспарланған.
Су көзі ретінде Өзбекстаннан келетін «Зах» каналы пайдаланылады. Осы канал арқылы магистралды құбыр тазартылады және Абай ауылы мен оған іргелес екі ауылдық округтің тұрғындары тәулік бойы үздіксіз таза ауыз сумен қамтамасыз етіледі. Бұл – 25 мыңнан астам адамның тұрмыс сапасын жақсартуға бағытталған маңызды жоба.
