Түркістан облысы, Келес ауданы, Бозай елді мекені жыл соңына дейін таза ауыз сумен қамтылады. Өткен жылы бастау алған жұмыстарды «Baratco» ЖШС-гі жүргізуде. Қазіргі таңда 726 метр тереңдікте ұнғыма қазылып, 24,2 шақырым су құбырлары орнатылды. Жалпы су құбырын ұзындығы 26 шақырымды құрайды. Құрылыс монтаж жұмыстары аяқталған соң 1700-ден астам тұрғын ауыз сумен қамтамасыз ететін болады. Бұл туралы Келес ауданының әкімі Ақментай Есбаев Бозай ауылдық округінің тұрғындарымен кездесуде мәлімдеді.
Бозайлықтар ауыл шаруашылығы саласында алдыңғы қатарда жүр. Соның ішінде мал шаруашалығымен айналысатын шарулардың қарасы басым. Мал шаруашылығын дамытамын деген шаруада жайылым жер мәселесі өзектілігін жоғалтпаған. Аудан басшысының алдынғы кездесуінде осы мәселе көтерілген болатын. 3 ай ішінде ауқымды жұмыстар атқарылған.
Мамыр айында Түркістан облысының әкімі Өмірзақ Шөкеев Келес ауданына барып, тұрғындармен кездесіп, жайылым мәселесіне қатысты пікірін білдірген болатын. «Жайылым тапшылығы – барлық ауданға тән проблема. Мал басы артқан. Мемлекет тарапынан пайдаланылмай жатқан алқаптарды ортақ жайылымға беру бойынша жұмыс жүріп жатыр. Бірақ онымен шешілуі қиын. Бұл ретте малшыларымыз мал бордақылау алаңдарын көбейту ісін қолға алғаны жөн. Жайылымдарды көбейту жұмысы жалғасады», – деген еді облыс әкімі.
Жайылым жер телімдерін ортақ пайдалануға енгізу жұмыстары бойынша Бозай ауылдық округі аумағынан 1375 гектар жайылым жер учаскесіне оң қортынды беріліп, жерге орналастыру жобасы істелінді. Қазіргі таңда аудан әкімдігінің қаулысы дайындалуда. Сонымен қатар 15 000 гектар жайылым бойынша жеке және заңды тұлғалармен үшжақты келісімшарт жасау жұмыстары жүруде. Бұл мәселе толық шешімін тауып, жайылым тұрғындарға берілмек.
Жалпы Келеске ауданы құрылған сәттен бюджетін молайтып, барынша қолдау көрсетіп келеді. Аудан орталығы көркейіп, жаңа ғимараттармен толықты. Ауданда құрылыс қарқыны күрт өсті. Былтыр бір жылда 20 мың шаршы метр үй берілді. 10 миллиард теңгенің жұмысы атқарылған. Газ бойынша 9 елді мекеннің құрылыс жұмыстары аяқталды. Бұл – жақсы көрсеткіш. Келестік ағайынның өзекті мәселелерін шешу бойынша жүйелі жұмыс жалғасуда.
Ауылда ауыл шаруашылығымен айналысу, үй іргелік жерді пайдалану тиімді. Оны үйретіп те, кәсіпкерлікке ден қойған азаматтарға қолдау көрсетіліп те жатыр. «Бір алқаптан жылына 2-3 өнім алу» жобасы Келес ауданынан бастау алған. Қазір аймаққа кең таралды. Мектеп мәселесіне келсек, жыл сайын Келесте 2-3 мектеп салынады. Бұл мәселе де облыс әкімдігінің назарында.
Еске сала кетсек, өткен жылы Келес ауданына барлығы 13,1 млрд. теңге инвестиция тартылып, 2020 жылмен салыстырғанда 543,5 млн. теңгеге немесе 104,3%-ға өскен. Ауыл шаруашылығы саласындағы өндірілген өнім көлемі 62,2 млрд. теңгені құрап, 2020 жылмен салыстырғанда 123,4 пайызға немесе 11,8 млрд. теңгеге артты. Егін шаруашылығы бойынша егіс көлемі 24,5 мың гектарға кеңейтіліп, 187 гектарға артты. Көкөніс, картоп және бақша дақылдарынан өнім 384,9 мың тоннаға жеткен. Ауданда алдыңғы қатарлы озық технологияны қолдана отырып, 1 алқаптан жылына 2-3 рет өнім алу бойынша 316 жоба өз жұмысын бастап, 121 мың тонна бақша және көкөніс өнімдері жиналған.
